പത്തനംതിട്ട: പത്തനംതിട്ട മൗണ്ട് സിയോണ് ലോ കോളേജില് കെട്ടിടത്തിനു മുകളില് കയറി ആത്മഹത്യ ഭീഷണി മുഴക്കി വിദ്യാര്ത്ഥി. മൂന്നാം സെമസ്റ്റര് വിദ്യാര്ത്ഥിയായ അശ്വിനാണ് ആത്മഹത്യ ഭീഷണി മുഴക്കിയത്. അനധികൃതമായി ഹാജര് വെട്ടിക്കുറച്ചു എന്നാണ് അശ്വിന് ഉള്പ്പെടെയുള്ള വിദ്യാര്ത്ഥികളുടെ ആരോപണം. ഡിറ്റന്ഷന് നടപടി നേരിട്ട അശ്വിന് കെട്ടിടത്തിന് മുകളിലും മറ്റു വിദ്യാര്ത്ഥികള് കോളേജിലുമാണ് പ്രതിഷേധം നടത്തുന്നത്.
അതിനിടെ, സംഭവത്തില് അനുനയ ശ്രമവുമായി മാനേജ്മെന്റ് പ്രതിനിധികള് രംഗത്തെത്തി. അശ്വിനടക്കമുള്ള നിരവധി വിദ്യാര്ത്ഥികള് ഡിറ്റന്ഷന് നടപടി നേരിട്ടതായി വിദ്യാര്ത്ഥികള് പറഞ്ഞു. ഡിറ്റന്ഷന് ചെയ്തത് അന്യായമായിട്ടാണെന്ന് ഹൈക്കോടതി കണ്ടെത്തിയിട്ടും വിദ്യാര്ത്ഥികളെ കോളേജിലേക്ക് തിരിച്ചു കയറ്റുന്നില്ലെന്നും വിദ്യാര്ത്ഥികള് പറയുന്നു. ഈ നിലപാട് തുടരുന്ന പ്രിന്സിപ്പല് കോളേജില് തുടരുന്നത് ആശങ്കയുണ്ടെന്നും വിദ്യാര്ത്ഥികള് വ്യക്തമാക്കി.
