അവശ്യവസ്തുക്കള്ക്ക് അമിത വില ഈടാക്കുന്നത് തടയാന് കോഴിക്കോട് താലൂക്കിലെ മാവൂര്, കുരിക്കത്തൂര്, ചെറുകുളത്തൂര്, കായലം, പെരുമണ്ണ, പാലാഴി പ്രദേശങ്ങളില് പ്രവര്ത്തിക്കുന്ന പച്ചക്കറി വില്പന ശാലകള്, പലവ്യഞ്ജന കടകള്, ഫ്രൂട്ട് സ്റ്റാളുകള്, ഫിഷ് മാര്ക്കറ്റുകള്, ചിക്കന് സ്റ്റാളുകള്, മെഡിക്കല് സ്റ്റോറുകള്, ബേക്കറികള് എന്നിവിടങ്ങളില് കോഴിക്കോട് താലൂക്ക് സപ്ലൈ ഓഫീസറും റേഷനിങ് ഇന്സ്പെക്ടര്മാരും പരിശോധന നടത്തി.
വില്പന വില പ്രദര്ശിപ്പിക്കാത്ത വ്യാപാരികള്ക്കും അമിത വില ഈടാക്കിയ വ്യാപാരികള്ക്കും നോട്ടീസ് നല്കി. അവശ്യ സാധനങ്ങള്ക്ക് ഏകീകൃത വില ഈടാക്കുന്നതിന് നടപടികള് എടുത്തു. താരതമ്യേന കൂടുതല് വില ഈടാക്കുന്നതായി ശ്രദ്ധയില്പെട്ട വ്യാപാരികള്ക്ക് വില കുറക്കുന്നതിന് കര്ശന നിര്ദ്ദേശം നല്കുകയും പുതുക്കിയ നിരക്ക് വിലവിവര പട്ടികകളില് രേഖപ്പെടുത്തുകയും ചെയ്തു.
പരിശോധനയില് താലൂക്ക് സപ്ലൈ ഓഫീസര് ശ്രീജ. എന്.കെ, റേഷനിങ് ഇന്സ്പെക്ടര് ആര്. മോഹന്കുമാര്, ജീവനക്കാരനായ പി. കെ. മൊയ്തീന് കോയ എന്നിവര് പങ്കെടുത്തു. കരിഞ്ചന്തയും പൂഴ്ത്തിവെപ്പും തടയുന്നതിന് കര്ശന പരിശോധനകള് തുടരും. മുന്പ് പരിശോധനകള് നടത്തിയ സ്ഥലങ്ങളിലെ ചില വ്യാപാരികള് നിര്ദ്ദേശങ്ങള് ലംഘിച്ചു വീണ്ടും അമിത വില ഈടാക്കുന്നതായി പരാതികള് ലഭിക്കുന്നതിന്റെ അടിസ്ഥാനത്തില് കട പിടിച്ചെടുക്കല് ഉള്പ്പെടെയുള്ള കര്ശന നടപടികള് സ്വീകരിക്കുമെന്ന് താലൂക്ക് സപ്ലൈ ഓഫീസര് അറിയിച്ചു.
