ചെന്നൈ: കരൂര് ദുരന്തത്തില് മരിച്ചവരുടെ കുടുംബാംഗങ്ങള്ക്ക് ജോലി നല്കിയ സര്ക്കാര് ഉത്തരവ് റദ്ദാക്കിയതിനെതിരെ സുപ്രീം കോടതിയെ സമീപിക്കാന് തമിഴ്നാട് സര്ക്കാര് തീരുമാനിച്ചു. മദ്രാസ് ഹൈക്കോടതി വിധിക്കെതിരെയാണ് സുപ്രീം കോടതിയില് അപ്പീല് നല്കുക. സഹാനുഭൂതിയുടെ അടിസ്ഥാനത്തിലുള്ള നിയമനം ഭരണഘടനാ വിരുദ്ധമാണെന്ന് വിലയിരുത്തിയായിരുന്നു മദ്രാസ് ഹൈക്കോടതിയുടെ നടപടി. എന്നാല് ഭരണഘടനയുടെ 162-ാം അനുച്ഛേദം അനുസരിച്ച് സംസ്ഥാനത്തിന്റെ ഭരണപരമായ അധികാരങ്ങള് ഉപയോഗിച്ചാണ് ഉത്തരവുകള് പുറപ്പെടുവിച്ചതെന്നാണ് തമിഴ്നാട് സര്ക്കാരിന്റെ വാദം. എങ്കിലും ഭരണപരമായ അധികാരങ്ങള് ഭരണഘടനാപരമായ പരിധിക്കുള്ളില് ആയിരിക്കണമെന്ന് കോടതി ചൂണ്ടിക്കാട്ടിയിരുന്നു.
സര്ക്കാരിന്റെ നടപടി ആര്ട്ടിക്കിള് 14, 16 എന്നിവയുടെ ലംഘനമാണെന്നും ജോലി ഒഴിവ് നികത്തേണ്ടത് ഭരണഘടനാ അനുസൃതമായി ആയിരിക്കണമെന്നും മദ്രാസ് ഹൈക്കോടതി നിരീക്ഷിച്ചിരുന്നു. സര്ക്കാര് സര്വീസില് മരിച്ചവരുടെ കുടുംബങ്ങളും നിയമനത്തിന് കാത്തിരിക്കുകയാണെന്നും, അതിനാല് മരിച്ചവരുടെ കുടുംബാംഗങ്ങള്ക്ക് സംരംഭകത്വ പരിശീലനം നല്കാമെന്നും ഹൈക്കോടതി പറയുകയുണ്ടായി.
കരൂര് ദുരന്തവുമായി ബന്ധപ്പെട്ട് ആശ്രിത നിയമനം അനുവദിച്ചാല് അത് മറ്റ് പലര്ക്കും അത്തരം തൊഴിലവസരങ്ങള് നേടാനുള്ള വഴികള് തുറക്കുമെന്നും ഹൈക്കോടതി വിലയിരുത്തി. പടക്ക നിര്മ്മാണ ശാലകളിലെ അപകടങ്ങളും വാഹന അപകടങ്ങളും അടക്കം ഉദാഹരണമായി ചൂണ്ടിക്കാട്ടിയ കോടതി, ഇത്തരത്തില് മരിക്കുന്നവരുടെ കുടുംബങ്ങള്ക്ക് നഷ്ടപരിഹാരം മാത്രമാണ് നല്കാറുള്ളതെന്നും വ്യക്തമാക്കി. പൊതു തൊഴില് സംസ്ഥാനം വെറുതെ കളയരുതെന്നും അത് നേടിയെടുക്കേണ്ട ഒന്നാണെന്നും, അതിന്റെ മൂല്യവും പ്രാധാന്യവും സംരക്ഷിക്കണമെന്നും ഹൈക്കോടതി വ്യക്തമാക്കിയിരുന്നു.
