പൃഥ്വിരാജ് ചിത്രം കടുവയുടെ ഒ.ടി.ടി റിലീസ് തടയണമെന്നാവശ്യപ്പെട്ട് വീണ്ടും ഹരജിയുമായി പാലാ സ്വദേശി ജോസ് കുരുവിനാക്കുന്നേല്. ഏറെ നാളത്തെ നിയമ പോരാട്ടത്തിന് ശേഷമാണ് ജൂലൈ ഏഴിന് കടുവ റിലീസ് ചെയ്തത്. കോടതി വിധി അനുസരിച്ച് പൃഥ്വിരാജ് അവതരിപ്പിച്ച നായക കഥാപാത്രത്തിന്റെ പേര് കടുവാക്കുന്നില് കുറുവച്ചന് എന്നതില് നിന്നും കുര്യച്ചന് എന്ന പേരിലേക്ക് മാറ്റിയാണ് റിലീസ് ചെയ്തത്. എന്നാല് കുര്യച്ചന് പേര് മാറ്റിയ പതിപ്പ് ഇന്ത്യയില് മാത്രമാണ് കാണിച്ചതെന്നും വിദേശ രാജ്യങ്ങളില് റിലീസ് ചെയ്ത ചിത്രത്തില് കുറുവച്ചന് എന്നുതന്നെയാണ് പേര് എന്നുമാണ് ജോസ് കുരുവിനാക്കുന്നിലിന്റെ പുതിയ പരാതി.ഹർജി ഫയലിൽ സ്വീകരിച്ച കോടതി കടുവയുടെ നിർമാതാക്കൾക്ക് നോട്ടീസ് അയക്കാൻ ഉത്തരവിറക്കി. കടുവ എന്ന സിനിമയുടെ കഥ തന്റെ ജീവിതകഥയാണെന്നും ഈ ചിത്രം പുറത്തിറങ്ങിയാല് അത് തനിക്കും കുടുംബത്തിനും അപകീര്ത്തിയുണ്ടാക്കുമെന്നും ആരോപിച്ചാണ് പാലാ സ്വദേശി ജോസ് കുരുവിനാക്കുന്നേല് പരാതി നല്കിയത്.
ന്യൂസിലാന്ഡ്, അമേരിക്ക, ദുബായ് എന്നീ വിദേശ രാജ്യങ്ങളില് ചിത്രം പ്രദര്ശിപ്പിച്ചതിന്റെ വിവരങ്ങള് തെളിവായി സമര്പ്പിച്ചുകൊണ്ടാണ് കുറുവച്ചന് ഹൈക്കോടതിയില് ഹര്ജി നല്കിയത്. നേരത്തെ കുറുവച്ചന് തിയറ്ററിലെത്തി ചിത്രം കണ്ടത് തെളിവുകള് ശേഖരിക്കാനാണെന്ന് അദ്ദേഹത്തോട് അടുത്ത വൃത്തങ്ങള് സൂചിപ്പിക്കുന്നു.
