കവി ചങ്ങമ്പുഴ കൃഷ്ണപിള്ളയുടെ കുടുംബവുമായുള്ള ബന്ധം ഊഷ്മളമായി തുടരുന്നുണ്ടെന്ന് യുവജന കമ്മീഷന് മുന് അധ്യക്ഷ ചിന്ത ജെറോം. വിവാദങ്ങള് ഉയര്ന്ന ഘട്ടത്തിലാണ് ചങ്ങമ്പുഴയുടെ മകള് ലളിതയെ ആദ്യം കാണുന്നത്. അന്ന് മുതല് സ്നേഹവും വാത്സല്യവും നല്കി ചേര്ത്തു നിര്ത്തുകയാണ് ആ കുടുംബമെന്ന് ചിന്ത ജെറോം ഫേസ്ബുക്കില് കുറിച്ചു.
ഫേസ്ബുക്ക് കുറിപ്പ്
മലയാളത്തിന്റെ പ്രിയ കവി ചങ്ങമ്പുഴയുടെ കുടുംബവുമായുള്ള ബന്ധം ഊഷ്മളമായി തുടരുന്നു..
വിവാദങ്ങള് ഉയര്ന്ന ഘട്ടത്തിലാണ് ലളിതാമ്മയെ കാണുന്നത് .അന്നുമുതല് സ്നേഹവും വാത്സല്യവും നല്കി ചേര്ത്തു നിര്ത്തുകയാണ് ആ കുടുംബം…
കഴിഞ്ഞദിവസം കൊച്ചുമകള് ശ്രീലത ബാംഗ്ലൂരില് നിന്നും നാട്ടിലെത്തിയപ്പോള് കാണാമെന്നു പറഞ്ഞിരുന്നു. ഇന്നലെ എറണാകുളത്ത് എത്തിയ സമയത്ത് ചങ്ങമ്പുഴയുടെ കുടുംബത്തിനൊപ്പം കുറച്ചു സമയം ചെലവഴിച്ചു..
നിറയെ സ്നേഹം…
ഏറെ സന്തോഷം…??
വാഴക്കുല എന്ന കവിത വൈലോപ്പിള്ളിയുടേതാണെന്ന് ചിന്ത ജെറോം തന്റെ ഗവേഷണ പ്രബന്ധത്തില് എഴുതിയതോടെയാണ് വിവാദം തുടങ്ങിയത്. പ്രബന്ധത്തിലെ ഈ പിഴവ് വിവാദമായതോടെ സാന്ദര്ഭികമായി സംഭവിച്ച തെറ്റാണെന്നായിരുന്നു ചിന്തയുടെ മറുപടി. തന്റെ പ്രബന്ധത്തിലെ ആ പരാമര്ശം നോട്ടപ്പിഴവാണെന്നും ചിന്ത കുറിച്ചു.
പ്രബന്ധത്തിലെ ഒരു വരിപോലും കോപ്പിയടിച്ചതല്ലെന്നും ചിന്ത അന്ന് വിശദീകരിക്കുകയുണ്ടായി. ആശയങ്ങള് ഉള്ക്കൊണ്ടിട്ടുണ്ടെന്നും പക്ഷേ ഒരു വരി പോലും കോപ്പി അടിച്ചിട്ടില്ലെന്നും ചിന്താ ജെറോം വിശദീകരിക്കുകയും ചെയ്തു. വിവാദമായതോടെ ചങ്ങമ്പുഴയുടെ കുടുംബാംഗങ്ങളെ എറണാകുളത്തെ വീട്ടിലെത്തി കണ്ടാണ് ചിന്ത വിശദീകരിച്ചത്.