ബസ് ഉടമകളുടെ സമ്മർദ്ദത്തിലൂടെ ചാർജ് വർധിപ്പിച്ചെന്ന് വരുത്തി തീർക്കാനാണ് ഇന്നത്തെ ബസ് സമരമെന്ന് ഗതാഗത മന്ത്രി ആന്റണി രാജു. അധികം താമസിയാതെ ചാർജ് വർധന നടപ്പിലാക്കുമെന്ന് അവർക്ക് തന്നെ അറിയാമെന്നും പരീക്ഷകൾ അടക്കം നടക്കുന്ന ഘട്ടത്തിൽ ജനങ്ങളെ ബുദ്ധിമുട്ടിച്ചുകൊണ്ട് ഇത്തരം ഒരു സമരത്തിന്റെ ആവശ്യം ഇല്ലായിരുന്നുവെന്നും ആന്റണി രാജു പറഞ്ഞു.
സർക്കാർ തീരുമാനം വൈകിയിട്ടില്ല. ഫെയർ വർധിപ്പിക്കേണ്ടി വരുമെന്ന് നേരത്തെ അറിയിച്ചതാണ്. ബസ് ഉടമകൾ ചർച്ചക്ക് തയ്യാറായാൽ ചർച്ച നടത്തും ബസ് മിനിമം നിരക്ക് വർധിപ്പിക്കുന്നതടക്കം ഈ മാസം 30 ന് ചേരുന്ന എല്ഡിഎഫ് യോഗത്തിൽ ചർച്ച ചെയ്യും. യാത്രാക്ലേശം ഒഴിവാക്കാനായി കെഎസ്ആർടിസി പരമാവധി സർവീസ് നടത്തും. ബസ് ഉടമകൾക്ക് നികുതി ഇളവുകൾ നൽകിയിട്ടുണ്ടെന്നും മന്ത്രി വ്യക്തമാക്കി.
മിനിമം ബസ് ചാർജ് 12രൂപയാക്കണം, കിലോമീറ്റർ നിരക്ക് ഒരു രൂപ പത്ത് പൈസ ഉയർത്തണം, വിദ്യാർത്ഥികളുടെ നിരക്ക് ആറ് രൂപയാക്കണം എന്ന ആവശ്യമുയർത്തിയാണ് ഇന്ന് ബസ് സമരം പ്രഖ്യാപിച്ചത്. ആവശ്യങ്ങൾ ഉടനടി നടപ്പിലാക്കണമെന്നും ഇല്ലാതെ മുന്നോട്ട് പോകാൻ കഴിയില്ലെന്നും ബസ് ഉടമകൾ ഗതാഗത മന്ത്രിയെ അറിയിച്ചിരുന്നു
