നിലമേല് സ്വദേശിനി വിസ്മയ സ്ത്രീധന പീഡനത്തെ തുടര്ന്ന് ആത്മഹത്യ ചെയ്ത കേസില് കോടതി വിധി ആശ്വാസകരമെന്ന് മന്ത്രി വീണ ജോര്ജ്. പ്രതിയായ ഭര്ത്താവ് കിരണ് കുമാര് കുറ്റക്കാരനാണെന്ന കോടതിയുടെ കണ്ടെത്തല് ആശ്വാസകരമെന്ന് മന്ത്രി വീണാ ജോര്ജ് വ്യക്തമാക്കി. സ്ത്രീധനമെന്ന ദുരാചാരം അവസാനിപ്പിക്കാനുള്ള പോരാട്ടത്തിന് ഇത് കരുത്ത് പകരും. പഴുതടച്ച അന്വേഷണം നടത്തി ശിക്ഷ ഉറപ്പിച്ച അന്വേഷണ സംഘത്തിന്റെയും പ്രോസിക്യൂഷന്റെയും പ്രവര്ത്തനങ്ങള് പ്രത്യേക പരാമര്ശം അര്ഹിക്കുന്നുവെന്നും മന്ത്രി പറഞ്ഞു.
കിരണ് കുമാറിന്റെ ശിക്ഷ നാളെ പ്രഖ്യാപിക്കും. സ്ത്രീധന പീഡനവും ആത്മഹത്യ പ്രേരണയും ഉള്പ്പെടെ വിസ്മയയുടെ ഭര്ത്താവ് കിരണിനെതിരെ ചുമത്തിയ പ്രധാന കുറ്റങ്ങളെല്ലാം നില നില്ക്കുന്നതാണെന്ന് കൊല്ലം ജില്ലാ അഡീഷണല് സെഷന്സ് കോടതി കണ്ടെത്തി. കിരണ് കുമാറിനെതിരെ പൊലീസ് ചുമത്തിയ ഏഴ് കുറ്റങ്ങളില് അഞ്ചും നിലനില്ക്കുമെന്ന് കോടതി പറഞ്ഞു.