മുതിര്ന്ന കോണ്ഗ്രസ് നേതാവ് കെവി തോമസ് നിയമസഭാ തെരഞ്ഞെടുപ്പില് യുഡിഎഫ് വിട്ട് ഇടത് പാളയത്തിലേക്ക് വരുന്നു എന്ന വാര്ത്തകള് ശക്തമായിരിക്കെ നിലപാട് വ്യക്തമാക്കി സിപിഎം. കെവി തോമസ് കോണ്ഗ്രസ് വിട്ട് വന്നാല് സ്വാഗതം ചെയ്യുമെന്ന് സിപിഎം എറണാകുളം ജില്ലാ സെക്രട്ടറി സി എന് മോഹനന് പ്രതികരിച്ചു. ഇതുവരെ കെവി തോമസുമായി സിപിഎം ചര്ച്ച നടത്തിയിട്ടില്ല എന്നാല് കോണ്ഗ്രസ് വിട്ട് വന്നാല് നേതൃത്വം അക്കാര്യം ആലോചിക്കും. തീരുമാനം പ്രഖ്യാപിക്കേണ്ടത് അദ്ദേഹമാണെന്നും സി എന് മോഹനന് മാധ്യമങ്ങളോട് പ്രതികരിച്ചു.
കഴിഞ്ഞ ലോക്സഭ തെരഞ്ഞെടുപ്പില് എറണാകുളത്ത് സീറ്റ് നിഷേധിച്ചത് മുതല് അതൃപ്തിയിലായിരുന്ന കെവി തോമസ് നിയമസഭാ തെരഞ്ഞെടുപ്പ് അടുത്തതോടെയാണ് വീണ്ടും സീറ്റ് ചര്ച്ച സജീവമാക്കിയത്. കെപിസിസിയും ഹൈക്കമാന്റും കാര്യമായ പിന്തുണ നല്കാത്തതും എറണാകുളത്തെ ഒരു വിഭാഗം നേതാക്കളുടെ എതിര്പ്പുമാണ് സ്ഥാനാര്ത്ഥിത്വത്തിന് തടസ്സമാകുന്നത്.
1984 മുതല് എംപിയും എംഎല്എയും കേന്ദ്ര മന്ത്രിയും സംസ്ഥാന മന്ത്രിയുമായി പല ചുമതലകള് വഹിച്ച കെവി തോമസിന് അവസരം കൊടുക്കുന്നതിനോട് പല നേതാക്കള്ക്കും വിയോജിപ്പുണ്ട്. കഴിഞ്ഞ ലോക്സഭാ തെരഞ്ഞെടുപ്പില് പോസ്റ്റര് പ്രചാരണം അടക്കം ആരംഭിച്ചതിന് ശേഷമാണ് എറണാകുളത്ത് സീറ്റ് നിഷേധിക്കപ്പെട്ടതും യുവ നേതാവായ ഹൈബി ഈഡന് സ്ഥാനാര്ത്ഥിയാകുന്നതും. അന്ന് ഹൈക്കമാന്ഡ് ഇടപെട്ടാണ് കെവി തോമസിനെ തണുപ്പിച്ചത്. പക്ഷേ വാഗ്ദാനം ചെയ്ത സ്ഥാനങ്ങളൊന്നും നല്കിയതുമില്ല.