അഹമ്മദാബാദ്: ഗുജറാത്തില് ചന്ദിപുര വൈറസ് (സിഎച്ച്പിവി) ബാധയെ തുടര്ന്ന് രണ്ട് കുട്ടികള് കൂടി മരിച്ചു. ഇതോടെ സംസ്ഥാനത്ത് മരിച്ചവരുടെ എണ്ണം എട്ടായെന്ന് ആരോഗ്യമന്ത്രി ഋഷികേശ് പട്ടേല് അറിയിച്ചു. ആകെ 15 പേര്ക്കാണ് രോഗം ഇതുവരെ സ്ഥിരീകരിച്ചിട്ടുള്ളത്. സബര്കാന്ത ജില്ലയില് നിന്നുള്ളവരാണ് രോഗബാധിതരില് നാലു കുട്ടികള്. ബാക്കിയുള്ളവര് മഹിസാഗര്, ഖേഡ എന്നിവിടങ്ങളില് നിന്നുള്ളവരാണ്.
രണ്ടു കുട്ടികള് രാജസ്ഥാനില് നിന്നും ഒരാള് മധ്യപ്രദേശില് നിന്നുമുള്ളതാണ്. ഇവര്ക്കും ഗുജറാത്തില് തന്നെയാണ് ചികിത്സ നല്കുന്നതെന്ന് ഋഷികേശ് പട്ടേല് പറഞ്ഞു. അതില് രാജസ്ഥാന് സ്വദേശി കഴിഞ്ഞ ദിവസം മരിച്ചു.
രോഗം റിപ്പോര്ട്ട് ചെയ്ത പ്രദേശങ്ങളില് കടുത്ത ജാഗ്രത പുലര്ത്താന് ആരോഗ്യവകുപ്പ് നിര്ദേശിച്ചിട്ടുണ്ട്. ചന്ദിപുര വൈറസിനു സമാനമായ രോഗലക്ഷണങ്ങളുമായി എത്തുന്നവരെ പ്രസ്തുതരോഗമായി തന്നെ പരിഗണിച്ച് ചികിത്സ നല്കണമെന്ന് കമ്മ്യൂണിറ്റി സെന്ററുകള്ക്കും പ്രാഥമികാരോഗ്യ കേന്ദ്രങ്ങള്ക്കും ജില്ലാ ആശുപത്രികള്ക്കും മെഡിക്കല് കോളജുകള്ക്കും നിര്ദേശം നല്കിയിട്ടുണ്ട്. ഈ രോഗം ബാധിച്ചാല് മരണനിരക്ക് കൂടുതലാണെന്നും ചികിത്സ വൈകിയാല് ആരോഗ്യം വഷളാകുമെന്നും ആരോഗ്യമന്ത്രി പറഞ്ഞു.
