തിരുവനന്തപുരം: ഷാര്ജയില് ആത്മഹത്യ ചെയ്ത വിപഞ്ചികയുടെയും മകളുടെയും മൃതദേഹം നാട്ടിലെത്തിക്കാന് ശ്രമിക്കുമെന്ന് അമ്മ ഷൈലജയ്ക്ക് ഉറപ്പ് നല്കി കേന്ദ്ര സഹമന്ത്രി സുരേഷ് ഗോപി. മൃതദേഹം വിട്ട് കിട്ടാനുള്ള ശ്രമമാണ് നടത്തുന്നതെന്ന് അദ്ദേഹം അമ്മയെ അറിയിച്ചു. സാധ്യമായതെല്ലാം ചെയ്യുമെന്നും സംസ്ഥാന സര്ക്കാരിന്റെ പിന്തുയോടെ മൃതദേഹങ്ങള് നാട്ടിലെത്തിക്കാനാണ് ശ്രമമെന്നും അദ്ദേഹം പറഞ്ഞു.
‘അമ്മയുടെ ആവശ്യങ്ങള് ന്യായമാണ്. കോണ്സുലേറ്റ് ശക്തമായി ഇടപെട്ടതിന്റെ ഭാഗമായി ഇന്നലെ സംസ്കാരം തടഞ്ഞു. വിപഞ്ചികയുടെ ഫോറന്സിക് റിപ്പോര്ട്ട് വന്ന്, കോണ്സുലേറ്റ് കൂടി അപ്രൂവ് ചെയ്തല്ലാതെ മൃതദേഹം വിട്ടുകൊടുക്കില്ല. അതിന് വേണ്ടി കാത്തിരിക്കണം. ഇന്ന് കോടതി തുറന്നാല് ഉടന് ഇടക്കാല ഉത്തരവ് വാങ്ങിത്തരാമെന്നാണ് കൗണ്സല് അറിയിച്ചത്. അത് വന്നാല് ഉടന് ഷാര്ജയിലേക്ക് അയച്ച് നിയമനടപടികള് സ്വീകരിക്കും’, അദ്ദേഹം പറഞ്ഞു.
