പെട്രോളിയം ഉത്പന്നങ്ങള് ജി.എസ്.ടിയുടെ പരിധിയില് ഉള്പ്പടുത്തുന്നത് കേന്ദ്ര സർക്കാരിന്റെ ആലോചനയിൽ. ജിഎസ്ടി കൗൺസിലിൽ കേന്ദ്രസർക്കാർ നിർദ്ദേശം മുന്നോട്ടു വയ്ക്കും. സംസ്ഥാനങ്ങളുടെ എതിർപ്പ് അവഗണിച്ചാണ് കേന്ദ്രത്തിന്റെ നീക്കം.കേരളമടക്കമുള്ള സംസ്ഥാനങ്ങൾ ആണ് പെട്രോളിയം ഉൽപ്പന്നങ്ങളുടെ ജി എസ് ടി പരിധിയിൽ കൊണ്ടുവരുന്നത് എതിർക്കുന്നത്.എന്നാൽ പെട്രോളിയം ഉത്പന്നങ്ങളെ ജി.എസ്.ടി പരിധിയില് ഉള്പ്പെടുത്തുന്നതിനെ ശക്തമായി എതിര്ക്കാനാണ് കേരളത്തിന്റെ തീരുമാനമെന്ന് സംസ്ഥാന ധനമന്ത്രി കെ.എന് ബാലഗോപാല് പറഞ്ഞു. നികുതി നിശ്ചയിക്കാന് സംസ്ഥാനങ്ങള്ക്ക് അവകാശമുണ്ട്. ഈ സ്വാതന്ത്ര്യത്തിന്മേലുള്ള കടന്നുകയറ്റമാണ് പുതിയ തീരുമാനമെന്നാണ് സംസ്ഥാനത്തിന്റെ വാദം.
കേരളത്തിന് പുറമേ മറ്റ് സംസ്ഥാനങ്ങളും ഇതേ അഭിപ്രായക്കാരാണ്. സമാനമായ അഭിപ്രായമുള്ള മറ്റ് സംസ്ഥാനങ്ങളുമായി കൗണ്സില് യോഗത്തിന് മുന്പ് കൂടിയാലോചന നടത്താനും സംസ്ഥാന സര്ക്കാര് ഉദ്ദേശിക്കുന്നുണ്ട്. പെട്രോള്-ഡീസല് വില ജി.എസ്.ടി പരിധിയില് ഉള്പ്പെടുത്തുന്നത് പരിഗണിച്ചുകൂടെ എന്ന് കേരള ഹൈക്കോടതി മുന്പ് ചോദിച്ചിരുന്നു.
വരാനിരിക്കുന്ന ഗുജറാത്ത്, ഉത്തര്പ്രദേശ് നിയമസഭാ തിരഞ്ഞെടുപ്പുകളിൽ ഇന്ധനവിലയും അതേത്തുടര്ന്നുള്ള വിലക്കയറ്റവും പ്രതിപക്ഷം പ്രചാരണവിഷയമാക്കുമെന്നിരിക്കെയാണ് കേന്ദ്രസർക്കാരിന്റെ പുതിയ നീക്കം. വിഷയം ജി.എസ്.ടി കൗണ്സിലില് അവതരിപ്പിച്ചപ്പോള് എതിര്പ്പുയര്ന്നുവെന്ന് വരുത്തിത്തീര്ക്കലാവും കേന്ദ്രം ഉദ്ദേശിക്കുന്നത്.
