തിരുവനന്തപുരം: അനധികൃത സ്വത്ത് സമ്പാദന കേസില് എഡിജിപി എംആര് അജിത് കുമാറിന് തിരിച്ചടി. അജിത്കുമാറിന് വിജിലന്സ് നല്കിയ ക്ലീന്ചിറ്റ് റിപ്പോര്ട്ട് തിരുവനന്തപുരം വിജിലന്സ് കോടതി തള്ളി. അജിത് കുമാര് ഭാര്യ സഹോദരന്റെ പേരില് കവടിയാറില് ഭൂമി വാങ്ങി ആഡംബര വീട് പണിതതില് അഴിമതി ഉണ്ടെന്നായിരുന്നു അജിത് കുമാറിനെതിരായ ആരോപണം. വിജിലന്സ് സമര്പ്പിച്ച ക്ലീന് ചിറ്റ് അംഗീകരിക്കാന് കഴിയില്ല എന്ന് കോടതി വ്യക്തമാക്കി. പരാതിക്കാരന്റെ മൊഴി ഈ മാസം 30ന് നേരിട്ട് രേഖപ്പെടുത്തുമെന്നും കോടതി അറിയിച്ചു.
മുന് എംഎല്എ പി വി അന്വറിന്റെ പരാതിയിലായിരുന്നു അജിത് കുമാറിനെതിരായ വിജിലന്സ് അന്വേഷണം നടത്തിയത്. എന്നാല് അന്വര് ആരോപിച്ച വീട് നിര്മ്മാണം, ഫ്ളാറ്റ് വാങ്ങല്, സ്വര്ണ്ണക്കടത്ത് എന്നിവയില് അജിത്കുമാര് അഴിമതി നടത്തിയതായി കണ്ടെത്താനായില്ലെന്നായിരുന്നു വിജിലന്സ് റിപ്പോര്ട്ടില് പറഞ്ഞത്. ഈ റിപ്പോര്ട്ടിനെതിരെയാണ് അഭിഭാഷകനായ നാഗരാജ് വിജിലന്സ് കോടതിയെ സമീപിച്ചത്. ഭാര്യ സഹോദരന്റെ പേരില് സെന്റിന് 70 ലക്ഷം വരുന്ന ഭൂമി വാങ്ങി അവിടെ ആഡംബര വീട് നിര്മ്മിക്കുന്നുവെന്നും, അഴിമതി പണം ഉപയോഗിച്ചാണ് ഇത് ചെയ്യുന്നതുമെന്നുമായിരുന്നു ഹര്ജിക്കാരനായ നാഗരാജ് ഹര്ജിയില് ആരോപിച്ചിരുന്നത്.
