ഒറ്റമുറിക്കുള്ളില് യുവതിയെ പത്തുവര്ഷത്തോളം ആരുമറിയാതെ ഒളിപ്പിച്ചു താമസിപ്പിച്ച സംഭവത്തിൽ സജിതയുടെ ഭർത്താവ് റഹ്മാൻ പുതിയ വെളിപ്പെടുത്തലുമായി രംഗത്ത്.സജിതയുടെ മതം മാറ്റാനുള്ള ശ്രമം താന് നടത്തിയിട്ടില്ലെന്നും അത്തരം പ്രചരണം തെറ്റാണെന്നും റഹ്മാന് പറയുന്നു. ‘അവള്ക്കിഷ്ടമുള്ള മതത്തില് വിശ്വസിക്കാം. എനിക്ക് താല്പര്യമൊന്നുമില്ല മതം മാറ്റാന്. അവളുടെ രീതിയില് അവള് ജീവിക്കട്ടെ. അത്തരം പ്രചരണം തെറ്റാണ്. മതം നോക്കിയില്ല സ്നേഹിച്ചത്,’ റഹ്മാന് പറഞ്ഞു.
സജിത ലവ് ജിഹാദിന്റെ ഇരയാണെന്ന് സംഘപരിവാര് വൃത്തങ്ങളില് നിന്നും ആരോപണമുയവരെയാണ് റഹ്മാന്റെ പ്രതികരണം. ഹിന്ദു ഐക്യവേദി സംസ്ഥാന അധ്യക്ഷ കെപി ശശികലയും നിയമസഭാ തെരഞ്ഞെടുപ്പില് ആലപ്പുഴയിലെ ബിജെപി സ്ഥാനാര്ത്ഥിയായിരുന്ന സന്ദീപ് വചസ്പതിയുമുള്പ്പെടയുള്ളവരാണ് ലവ് ജിഹാദ് ആരോപണവുമായി രംഗത്തെത്തിയത്.
‘ഇതിനെ ദിവ്യ പ്രണയമായി അംഗീകരിച്ച് തൊണ്ട തൊടാതെ വിഴുങ്ങാനൊന്നും പറ്റില്ല. ഒരു പെണ്കുട്ടിയെ 10 വര്ഷം ലൈംഗിക അടിമയാക്കിയുള്ള പീഡനമാണ് സംഭവിച്ചത്. വന് ക്രിമിനല് പ്രവര്ത്തനം. അല്ലാതെ മൊയ്തീന്കാഞ്ചന മാല ടൈപ്പ് പ്രണയം ഒന്നുമല്ല. ഇതേപ്പറ്റി സമഗ്രമായ അന്വേഷണം വേണം. അല്ലാതെ ഇയാള് പറയുന്ന കഥ വിശ്വസിച്ചാല് വലിയ ഒരു കുറ്റകൃത്യമാണ് തേഞ്ഞുമാഞ്ഞു പോവുക. സ്റ്റോക്ഹോം സിന്ഡ്രോം ബാധിച്ച പെണ്കുട്ടിയെ അടിയന്തിരമായി വിദഗ്ധ ചികിത്സയ്ക്ക് വിധേയയാക്കണം,’ സന്ദീപ് വചസ്പതി ഫേസ്ബുക്കില് കുറിച്ചു.
മൂന്ന് മാസങ്ങള്ക്ക് മുമ്പ് വീട്ടില് നിന്നും കാണാതായ റഹ്മാനെ സഹോദരന് അവിചാരിതമായി കണ്ടുമുട്ടുന്നതോടെയാണ് നാടിനെ നടുക്കിയ പ്രണയകഥ പുറം ലോകം അറിയുന്നത്. വ്യത്യസ്ത മതങ്ങളില്പ്പെട്ട ഇരുവരും വീട്ടുകാരെ ഭയന്നാണ് ഒളിവില് ദാമ്പത്യം ആരംഭിച്ചത്.
ഇവരുടെ പ്രണയകഥ പുറത്തുവന്നതോടെ റഹ്മാന് സജിതയെ മതം മാറ്റിയെന്ന തരത്തിലുള്ള ആരോപണങ്ങളും ശക്തമായിരുന്നു. ഈ ആരോപണമാണ് റഹ്മാൻ ഇപ്പോൾ തള്ളിയിരിക്കുന്നത്.
