പന്തീരാങ്കാവ്: അറപ്പുഴയിൽ വീട്ടിലെ കിണറില് നിന്നും വെള്ളം എടുക്കാനായി സ്ഥാപിച്ച മോട്ടോര് പമ്പ് മോഷ്ടിച്ചു കടന്നുകളഞ്ഞ പ്രതികൾ പിടിയിൽ. പന്തീരാങ്കാവ് ഒഴിക്കില് വീട്ടിൽ രാഹുൽ (23 ), പെരുമണ്ണ കട്ടക്കളത്തിങ്ങൽ വീട്ടിൽ മുഹമ്മദ് ഷാഫി (26) എന്നിവരെയാണ് പന്തീരാങ്കാവ് പോലീസ് പിടികൂടിയത്. പന്തീരാങ്കാവിൽ വെച്ചാണ് പ്രതികളെ കസ്റ്റഡിയിൽ എടുത്തത്.
കഴിഞ്ഞ മെയ് മാസം അറപ്പുഴ സ്വദേശിയായ ഹനീഫയുടെ വീട്ടില് കിണറില് നിന്നും വെള്ളം എടുക്കാനായി സ്ഥാപിച്ച മോട്ടോര് പമ്പ് പ്രതികള് മോഷണം നടത്തി കൊണ്ടുപോകുകയായിരുന്നു. തുടർന്ന് ഹനീഫയുടെ പരാതിയില് പന്തീരാങ്കാവ് പോലീസിൽ പരാതി നൽകി. സംഭവസ്ഥലത്തെയും സമീപപ്രദേശങ്ങളിലെയും നിരവധി സിസിടിവി ദൃശ്യങ്ങള് പരിശോധിച്ചതില് നിന്നാണ് പ്രതികളെക്കുറിച്ച് സൂചന ലഭിച്ചത്.
ഇൻസ്പെക്ടർ ശ്രീകുമാറിന്റെ നേതൃത്വത്തിൽ എസ്ഐ അബുതാഹിര്, സിപിഒമാരായ അതുല്, ദീപക് എന്നിവരടങ്ങിയ അന്വേഷണ സംഘമാണ് പ്രതികളെ പിടികൂടിയത്. അറസ്റ്റ് രേഖപ്പെടുത്തിയ ശേഷം പ്രതികളെ കോടതിയിൽ ഹാജരാക്കി.
പന്തീരാങ്കാവിൽ മോട്ടോര് പമ്പ് മോഷ്ടിച്ച പ്രതികൾ പിടിയിൽ
