കുന്ദമംഗലത്ത് നാല് വയസുകാരനെ തട്ടിക്കൊണ്ടുപോകാൻ ശ്രമം

നാല് വയസുള്ള കുട്ടിയെ തട്ടിക്കൊണ്ടുപോകാൻ ശ്രമം. കഴിഞ്ഞ ദിവസം കുന്ദമംഗലം ആനപ്പാറയിൽ വിവാഹ വീട്ടിലാണ് സംഭവം. കുന്ദമംഗലം ആനപ്പാറ എടവലത്ത് ലക്ഷം വീട് കോളനിയിൽ ജിജോ ആന്റോ (33) സംഭവത്തിൽ പിടിയിലായി. കുറ്റിക്കാട്ടൂർ സ്വദേശികളായ കുട്ടിയും കുടുംബവും അമ്മാവന്റെ കുന്ദമംഗലം ആനപ്പാറയുള്ള വീട്ടിൽ വിവാഹത്തിൽ പങ്കെടുക്കാൻ വന്നതായിരുന്നു. വിവാഹം കഴിഞ്ഞ് അന്ന് രാത്രിയിൽ ആണ് കുട്ടിയെ ഒരാൾ എടുത്ത് ഓടിപ്പോകുന്നത് വിവാഹം കഴിഞ്ഞ് മടങ്ങിപ്പോകുന്ന കുട്ടിയുടെ ബന്ധുക്കൾ കാണുന്നത്. അപ്പോൾ തന്നെ വീട്ടുകാരെ അറിയിക്കുകയും ഇയാളെ പിടികൂടി പൊലീസിൽ ഏൽപ്പിക്കുകയും ചെയ്തു. വിവാഹ വീട്ടിൽ പാട്ട് വെച്ചതിനാൽ പേടിച്ചുപോയ കുട്ടിയുടെ കരച്ചിൽ ആരും കേട്ടില്ല. ഈ സമയം കുട്ടി വീട്ടിൽ കളിച്ചുകൊണ്ടിരിക്കുകയായിരുന്നു എന്ന് വീട്ടുകാർ പറഞ്ഞു. ജിജോ ആന്റോയെ റിമാൻഡ് ചെയ്തു.