ലഖിംപൂര് ഖേരിയില് കര്ഷക പ്രതിഷേധത്തിലേക്ക് വാഹനം പാഞ്ഞുകയറി കര്ഷകരുള്പ്പെടെ മരിച്ച സംഭവത്തില് പ്രതിയും കേന്ദ്ര ആഭ്യന്തര സഹമന്ത്രി അജയ് മിശ്രയുടെ മകനുമായ ആശിഷ് മിശ്ര നേപ്പാളിലേക്ക് കടന്നതായി സംശയം. ഇന്ന് രാവിലെ പത്ത് മണിക്ക് ചോദ്യംചെയ്യലിന് ഹാജരാകാന് യുപി പോലീസ് ആശിഷ് മിശ്രയ്ക്ക് നോട്ടീസ് നല്കിയിരുന്നു. എന്നാല് ഇതുവരെ ആശിഷ് ചോദ്യം ചെയ്യലിന് ഹാജരായിട്ടില്ല. ആശിഷ് മിശ്ര ഇപ്പോള് എവിടെയാണുള്ളതെന്ന് പൊലീസിന് യാതൊരു വിവരവും ലഭിച്ചിട്ടില്ല. മൊബൈല് ഫോണ് കേന്ദ്രീകരിച്ച് നടത്തിയ അന്വേഷണത്തില് ആശിഷ് മിശ്ര ഇന്ത്യ-നേപ്പാള് അതിര്ത്തിയില് ഉള്ളതായാണ് ഒടുവില് ലഭിച്ച വിവരം.
നേപ്പാളുമായി അതിര്ത്തി പങ്കിടുന്ന ജില്ലയാണ് ഉത്തര്പ്രദേശിലെ ലഖിംപുര് ഖേരി. വന് പോലീസ് സന്നാഹമാണ് ആശിഷ് മിശ്രയ്ക്കായി തിരച്ചില് നടത്തുന്നതിനായി രംഗത്തുള്ളത്.
ആശിഷ് മിശ്രയുടെ വസതിക്ക് മുന്നില് നേരത്തെ യുപി പോലീസ് നോട്ടീസ് പതിച്ചിരുന്നു. സംഭവവുമായി ബന്ധപ്പെട്ട് പോലീസ് ആരെയൊക്കെ അറസ്റ്റ് ചെയ്തു എന്നുതുടങ്ങിയ വിവരങ്ങള് സുപ്രീം കോടതി ഇന്നലെ ആവശ്യപ്പെട്ടിരുന്നു. ഇതിന് പിന്നാലെ പോലീസ് നടപടികള് കര്ക്കശമാക്കിയതിന്റെ ഭാഗമായാണ് ചോദ്യംചെയ്യലിന് ഹാജരാകാന് ആശിഷ് മിശ്രയ്ക്ക് നോട്ടീസ് നല്കിയത്. സംഭവത്തില് ആശിഷിന്റെ സഹായികളായ ആശിഷ് പാണ്ഡെ, ലവ്കുശ് റാണ എന്നിവരെ പൊലീസ് വ്യാഴാഴ്ച അറസ്റ്റ് ചെയ്തിരുന്നു.
കാര്ഷിക നിയമങ്ങള്ക്കെതിരെ ലഖിംപൂര് ഖേരിയില് പ്രതിഷേധിക്കുകയായിരുന്ന കര്ഷകര്ക്കടയിലേക്കാണ് വാഹനവ്യൂഹം ഇടിച്ചുകയറിയത്. സംഭവത്തില് നാലു കര്ഷകര് ഉള്പ്പെടെ എട്ടുപേരാണ് മരിച്ചത്. വാഹനവ്യൂഹം കര്ഷകരുടെ പിന്നില്നിന്ന് ഇടിച്ചുകയറുന്ന വിഡിയോ പിന്നീട് പുറത്തുവന്നിരുന്നു.
