ഹരിയാനയിലേയും കര്ഷക സമരത്തിനിടയിലേക്ക് കാര് ഓടിച്ചു കയറ്റി. ബി.ജെ.പി എം.പി നയബ് സൈനിയുടെ കാറാണ് സമരത്തിനിടയിലേക്ക് ഓടിച്ചുകയറ്റിയതെന്ന് കര്ഷകര് പറയുന്നു.കേന്ദ്രസര്ക്കാരിന്റെ വിവാദ കാര്ഷിക നിയമങ്ങള്ക്കെതിരെ പ്രതിഷേധിക്കുന്ന കര്ഷകര്ക്കുനേരെ ഇത് രണ്ടാമത്തെ തവണയാണ് ആക്രമണം.
കുരുക്ഷേത്ര എം.പിയായ നയബ് സൈനിയും ഖനനമന്ത്രി മൂള് ചന്ദ് ശര്മയും മറ്റ് നേതാക്കളും അംബാലയില് ഒരു പരിപാടിയില് പങ്കെടുക്കാന് വന്നതായിരുന്നു. കാര്ഷിക നിയമത്തിനെതിരെ ഇവിടെ ദിവസങ്ങളായി കര്ഷകര് സമരത്തിലാണ്.
പരിപാടി കഴിഞ്ഞ് നേതാക്കള് മടങ്ങിപ്പോകുമ്പോഴാണ് കര്ഷകര്ക്കിടയിലേക്ക് കാര് ഓടിച്ചുകയറ്റിയതെന്ന് കര്ഷകര് പറയുന്നു.
യു.പിയില് കാര്ഷികനിയമങ്ങള്ക്കെതിരെ നടന്ന കര്ഷകരുടെ പ്രതിഷേധത്തിനിടയിലേക്ക് കേന്ദ്ര ആഭ്യന്തര സഹമന്ത്രി അജയ് മിശ്രയുടെ മകന് ആശിഷ് മിശ്ര വാഹനം ഇടിച്ചുകയറ്റുകയായിരുന്നു. നാല് കര്ഷകരുള്പ്പെടെ എട്ടുപേരാണ് അപകടത്തില് കൊല്ലപ്പെട്ടത്.
