മലപ്പുറം: പാണക്കാട്ടുണ്ടായ വൻ മണ്ണിടിച്ചിലിന് കാരണം അനധികൃതമായി നടത്തിയ പാറപൊട്ടിക്കലാണെന്ന് മന്ത്രി പി കെ കുഞ്ഞാലിക്കുട്ടി. നഗരസഭ മണ്ണ് മാറ്റാൻ മാത്രമാണ് അനുമതി നൽകിയിരുന്നതെന്നും എന്നാൽ ഇതിന്റെ മറവിൽ ആരുമറിയാതെ പാറ പൊട്ടിക്കുകയായിരുന്നുവെന്നും പ്രദേശം സന്ദർശിച്ച ശേഷം മന്ത്രി പറഞ്ഞു. അപകടം നടന്ന സ്ഥലത്ത് ഒരുതരത്തിലുള്ള നിർമ്മാണ പ്രവൃത്തികളും ഇനി അനുവദിക്കില്ലെന്നും അദ്ദേഹം വ്യക്തമാക്കി.
സംഭവത്തിൽ ജിയോളജി വകുപ്പ് ഉദ്യോഗസ്ഥർക്ക് ഗുരുതര വീഴ്ച സംഭവിച്ചിട്ടുണ്ടെന്നും മുൻകൂട്ടി ഇടപെടുന്നതിൽ അവർ പരാജയപ്പെട്ടെന്നും മന്ത്രി വിമർശിച്ചു. വീഴ്ച വരുത്തിയ ഉദ്യോഗസ്ഥർക്കും സ്ഥലമുടമയ്ക്കും കാരണം കാണിക്കൽ നോട്ടീസ് നൽകിയിട്ടുണ്ട്. ദുരന്തത്തിന്റെ പശ്ചാത്തലത്തിൽ സംസ്ഥാനത്തുടനീളമുള്ള അനധികൃത ക്വാറി പ്രവർത്തനങ്ങളും മണ്ണെടുപ്പും പൂർണ്ണമായി നിർത്തിവെപ്പിച്ചതായും ജനങ്ങളുടെ ജീവനാണ് സർക്കാരിന് പ്രഥമ പരിഗണനയെന്നും മന്ത്രി കൂട്ടിച്ചേർത്തു.
സ്വകാര്യ വ്യക്തി നിർമ്മാണത്തിനായി മണ്ണുമാന്തിയ സ്ഥലത്താണ് അപകടമുണ്ടായത്. പ്രദേശത്തെ സന്ദർശനത്തിനിടെ പൊലീസുകാരും മാധ്യമപ്രവർത്തകരും നാട്ടുകാരും തലനാരിഴയ്ക്കാണ് രക്ഷപ്പെട്ടത്. വിദഗ്ധ സമിതി റിപ്പോർട്ടിന്റെ അടിസ്ഥാനത്തിൽ പ്രദേശം പരിസ്ഥിതി ലോല മേഖലയായി പ്രഖ്യാപിക്കുന്നത് പരിഗണിക്കുമെന്ന് ജില്ലാ കളക്ടറും അറിയിച്ചു.
