ട്വിറ്ററിന് സമാനമായി പ്രവർത്തിക്കുന്ന പുതിയ മൈക്രോ ബ്ലോഗിങ് പ്ലാറ്റ്ഫോമുമായി രംഗത്തെത്തിയിരിക്കുകയാണ് ഫേസ്ബുക്ക്, ഇൻസ്റ്റഗ്രാം, വാട്സ്ആപ്പ് എന്നിവയുടെ ഉടമകളായ മെറ്റ. ത്രെഡ്ര്സ് (Threads) എന്ന പേരിലാണ് മെറ്റ പുതിയ പ്ലാറ്റ്ഫോം ആരംഭിച്ചിരിക്കുന്നത്. ഈ പ്ലാറ്റ്ഫോം ഇന്ത്യയിൽ അടക്കം ആഗോള തലത്തിലാണ് ലോഞ്ച് ചെയ്തിരിക്കുന്നത്. ത്രെഡ്സ് ആപ്പ് ഗൂഗിൾ പ്ലേ സ്റ്റോറിലും ആപ്പിൾ ആപ്പ് സ്റ്റോറിലും ലഭ്യമാക്കിയിട്ടുണ്ട്. ട്വിറ്ററിന്റെ പകർപ്പാണ് എങ്കിലും ഇൻസ്റ്റഗ്രാമിന്റെ എക്സ്റ്റൻഷൻ എന്ന നിലയിലാണ് മെറ്റ പുതിയ പ്ലാറ്റ്ഫോം അവതരിപ്പിച്ചിരിക്കുന്നത്.
തുടക്കത്തിൽ തന്നെ വലിയ സ്വീകര്യതയാണ് പ്ലാറ്റ്ഫോമിന് ലഭിക്കുന്നത്. ട്വിറ്ററിനെക്കാൾ വലിയ പ്ലാറ്റ്ഫോമായി മാറാൻ മെറ്റയ്ക്ക് കീഴിലുള്ള ഇൻസ്റ്റഗ്രാം ഉപയോഗിക്കുന്നതിൽ നാലിൽ ഒന്ന് ആളുകൾ ത്രഡ്സ് കൂടി ഉപയോഗിച്ചാൽ മതിയാകും. ട്വിറ്ററിൽ നിന്നും ത്രെഡ്സ് എടുത്തിട്ടുള്ള ഫീച്ചറുകളിൽ ഉപയോക്താക്കൾക്ക് കണക്റ്റ് ചെത് പോസ്റ്റുകളുടെ ഒരു സീരീസ് പബ്ലിഷ് ചെയ്യാൻ സാധിക്കുന്ന ഫീച്ചർ പ്രധാനമാണ്. ഇൻസ്റ്റാഗ്രാം ഉപഭോക്താക്കളെ ആകർഷിക്കാൻ, ഇൻസ്റ്റാഗ്രാമിലെ വേരിഫൈഡ് ഉപയോക്താക്കൾക്ക് സൈൻ അപ്പ് ചെയ്യുമ്പോൾ ത്രെഡ്സിൽ ഓട്ടോമാറ്റിക്കായി ബ്ലൂ ടിക്ക് ലഭിക്കും.
മെറ്റയുടെ ത്രെഡ്സ് നിങ്ങൾക്ക് ഗൂഗിൾ പ്ലേയിൽ നിന്നോ ആപ്പിൾ ആപ്പ് സ്റ്റോറിൽ നിന്നോ ആപ്പ് ഡൗൺലോഡ് ചെയ്യാം. ലോഗിൻ ചെയ്യാനായി ഇൻസ്റ്റാഗ്രാം ഐഡി ഉപയോഗിക്കാനും സാധിക്കും. നിങ്ങൾ ഇതിനകം ഫോണിൽ ഇൻസ്റ്റാഗ്രാം ആപ്പ് ഉപയോഗിക്കുന്നുണ്ട് എങ്കിൽ വിവരങ്ങൾ ടൈപ്പ് ചെയ്ത് നൽകാതെ, പെർമിഷൻ കൊടുത്താൽ ഇൻസ്റ്റഗ്രാം ലോഗിൻ ഡാറ്റ ഉപയോഗിച്ച് ഓട്ടോമാറ്റിക്കായി ലോഗിൻ ചെയ്യും. ഇൻസ്റ്റഗ്രാം ഫോട്ടോ, വീഡിയോ ഷെയറിങ് പ്ലാറ്റ്ഫോമായി നിലനിൽക്കുമ്പോൾ ത്രെഡ്സിനെ ടെക്സ്റ്റ് ഷെയറിങ് പ്ലാറ്റ്ഫോമായിട്ടാണ് മെറ്റ അവതരിപ്പിച്ചിരിക്കുന്നത്.
ഫേസ്ബുക്കിൽ ടെക്സ്റ്റുകൾ പോസ്റ്റ് ചെയ്യാനുള്ള സൌകര്യം ഉണ്ടെങ്കിലും, മെറ്റ ത്രെഡ്സിലൂടെ ഉദ്ദേശിക്കുന്നത് ട്വിറ്ററിന് സമാനമായ മൈക്രോ ബ്ലോഗിങ് പ്ലാറ്റ്ഫോം ഉണ്ടാക്കുക എന്നതാണ്. ഓരോ പോസ്റ്റിലും 500 ക്യാരക്ടറുകൾ വരെ ചേർക്കാൻ മാത്രമേ സാധിക്കുകയുള്ളു. ലിങ്കുകളും ഫോട്ടോകളും ഒരു പോസ്റ്റിന് പത്ത് വരെയാണ് ചേർക്കാൻ സാധിക്കുന്നത്. 5 മിനിറ്റ് വരെ ദൈർഘ്യമുള്ള വീഡിയോകളും പോസ്റ്റ് ചെയ്യാൻ സാധിക്കും. നിങ്ങളുടെ ത്രെഡ് പോസ്റ്റിന് ആർക്കൊക്കെ റിപ്ലെ നൽകാം എന്ന കാര്യം ഉപയോക്താക്കൾക്ക് നിയന്ത്രിക്കാനാകും.
മെറ്റയുടെ പുതിയ പ്ലാറ്റ്ഫോമായ ത്രെഡ്സ് ആരംഭിച്ച് ആദ്യത്തെ നാല് മണിക്കൂറിൽ തന്നെ 5 ദശലക്ഷത്തിൽ അധികം ആളുകൾ സൈൻ അപ്പ് ചെയ്തതായി മാധ്യമങ്ങൾ റിപ്പോർട്ട് ചെയ്തു. ത്രഡ്സ് ലോഞ്ച് ചെയ്തതിന് തൊട്ട് പിന്നാലെ ആദ്യ രണ്ട് മണിക്കൂറിനുള്ളിൽ 2 ദശലക്ഷം സൈൻ അപ്പുകളാണ് ഉണ്ടായിരിക്കുന്നത് എന്ന് മെറ്റയുടെ സിഇഒ മാർക്ക് സക്കർബർഗ് നേരത്തെ പോസ്റ്റ് ചെയ്തിരുന്നു. ട്വിറ്ററിനെ മറികടക്കാനുള്ള ലക്ഷ്യത്തിലാണ് ത്രഡ്സിന്റെ ഈ മുന്നേറ്റം എന്നതാണ് ഏറ്റവും ശ്രദ്ധേയമായ കാര്യം. ത്രെഡ്സിനായി പ്രത്യേകം വെബ്സൈറ്റും വൈകാതെ പുറത്തിറങ്ങും.
