മിഥുന മാസപൂജകള്ക്കായി ശബരിമല ജൂണ് 14ന് നട തുറക്കും. ദര്ശനത്തിന് വെര്ച്വല് ക്യൂവിലൂടെ ബുക്ക് ചെയ്യാന് സംവിധാനമൊരുക്കും. ബുക്ക് ചെയ്യാത്തവരെ കടത്തിവിടില്ല. 5 പേരുടെ ടീമായി തിരിച്ചാകും ശബരിമലയിലേക്ക് ഭക്തരെ കടത്തിവിടുക.
ശബരിമലയില് ഒരു മണിക്കൂറില് 200 പേരുടെ റജിസ്ട്രേഷന് നടത്തും. രാവിലെ 4 മണി മുതല് ഉച്ചയ്ക്ക് 1 മണിവരെയും വൈകിട്ട് 4 മുതല് രാത്രി 11 വരെയും ദര്ശനം ഉണ്ടാകും. ഒരു സമയം 50 പേര് മാത്രമേ തിരുമുറ്റത്ത് ഉണ്ടാകൂ. ബാക്കിയുള്ളവര് ക്യൂവില് ശാരീരിക അകലം പാലിച്ചു നില്ക്കണം. 10 വയസ്സിനു താഴെയുള്ളവര്ക്കും 65 വയസ്സിനു മുകളിലുള്ളവര്ക്കും റജിസ്ട്രേഷന് നടത്താനാകില്ല. പമ്പയിലും സന്നിധാനത്തും തെര്മല് സ്കാനര് ഉപയോഗിച്ച് പരിശോധന നടത്തും. ഭക്തര് മാസ്ക് നിര്ബന്ധമായും ധരിക്കണം. വിവിഐപി ദര്ശനവും താമസസൗകര്യവും ഉണ്ടാകില്ല. 11 മണിക്ക് ദര്ശനം കഴിഞ്ഞാല് മല ഇറങ്ങണം. എന്നിങ്ങനെ നിയന്ത്രണങ്ങള് ഉണ്ടാവും.