ജപ്പാന് മുകളിലൂടെ ബാലിസ്റ്റിക് മിസൈല് അയച്ച് ഉത്തരകൊറിയ.ആണവായുധം വഹിക്കാൻ ശേഷിയുള്ള ദീർഘദൂര മിസൈലാണ് തൊടുത്തത്. വടക്കുകിഴക്കന് പ്രദേശങ്ങളില് ജപ്പാന് സൈന്യം സുരക്ഷ ശക്തമാക്കി വരികയാണ്. മേഖലയിലെ ജനങ്ങളെ ഭൂഗര്ഭ അറകളിലേക്കും മറ്റ് സുരക്ഷിത സ്ഥാനങ്ങളിലേക്കും മാറ്റുന്ന പ്രവര്ത്തനങ്ങള് പുരോഗമിക്കുകയാണ്. വടക്കന് ജപ്പാനിലെ ട്രെയിന് ഗതാഗതം പൂര്ണമായി നിലച്ചു,ജപ്പാന് മുകളിലൂടെ പറന്ന മിസൈല് പസഫിക് സമുദ്രത്തില് പതിച്ചതായി ജപ്പാന് സ്ഥിരീകരിച്ചിട്ടുണ്ട്.മിസൈല് 22 മിനിറ്റോളം ജപ്പാന് മുകളിലൂടെ പറന്നു, തുടര്ന്ന് രാജ്യത്തിന്റെ എക്സ്ക്ലൂസീവ് ഇക്കണോമിക് സോണിന് പുറത്തുള്ള സമുദ്രമേഖലയില് പതിച്ചു. നാശനഷ്ടങ്ങളൊന്നും റിപ്പോര്ട്ട് ചെയ്തിട്ടില്ലെന്ന് ജാപ്പനീസ് ചീഫ് കാബിനറ്റ് സെക്രട്ടറി വ്യക്തമാക്കി.
ഉത്തരകൊറിയയുടെ നടപടിയെ ജപ്പാന് പ്രധാനമന്ത്രി ഫ്യൂമിയോ കിഷിദ അപലപിച്ചു. ‘മിസൈല് പരീക്ഷണത്തിന് പിന്നാലെ വെടിവെപ്പുമുണ്ടായി. ഉത്തകൊറിയയുടേത് അശ്രദ്ധമായ ഒരു നടപടിയാണ്. സംഭവത്തെ അപലപിക്കുന്നുവെന്നും സ്ഥിതിഗതികള് ചര്ച്ച ചെയ്യാന് ദേശീയ സുരക്ഷാ കൗണ്സില് വിളിക്കുമെന്നും അദ്ദേഹം പറഞ്ഞു.കഴിഞ്ഞ 10 ദിവസത്തിനുള്ളില് ഉത്തര കൊറിയ നടത്തിയ അഞ്ചാം റൗണ്ട് ആയുധ പരീക്ഷണമാണ് ജപ്പാന് മുകളില് കൂടിയുള്ള ഈ മിസൈല് വിക്ഷേപണം. ദക്ഷിണ കൊറിയയും അമേരിക്കയും തമ്മിലുള്ള സംയുക്ത സൈനികാഭ്യാസത്തിന് പ്രതികരണമായാണ് ഉത്തരകൊറിയയുടെ പരീക്ഷണമെന്നാണ് വിലയിരുത്തല്.
