കോന്നി താലൂക്ക് ഓഫീസിലെ കൂട്ട അവധിയില് നടപടിക്ക് ജില്ലാ കലക്ടറുടെ ശുപാര്ശ. ഉദ്യോഗസ്ഥരുടെ അവധി ഓഫീസിൽ എത്തിയ പൊതുജനങ്ങൾക്ക് ബുദ്ധിമുട്ടുണ്ടാക്കിയെന്നും ഇത് സർവീസ് ചട്ടങ്ങളുടെ ലംഘനമാണെന്നും റിപ്പോർട്ടിൽ പറയുന്നു. ഇന്നലെ രാത്രിയാണ് കളക്ടർ റിപ്പോർട്ട് സമർപ്പിച്ചത്.. ജില്ലാ കലക്ടര് അന്വേഷണ റിപ്പോര്ട്ട് ലാന്ഡ് റവന്യൂ കമ്മീഷണര്ക്ക് കൈമാറി. റിപ്പോർട്ടിന് മേൽ നടപടി എടുക്കേണ്ടത് ലാൻഡ് റവന്യു കമ്മീഷണറാണ്. കോന്നി താലൂക്ക് ഓഫീസിലെ 40 ഓളം ജീവനക്കാരാണ് വെള്ളിയാഴ്ച ജോലിക്ക് ഹാജരാകാതിരുന്നത്. ഇവരില് പകുതിയോളം പേര് ലീവ് അപേക്ഷ നല്കിയിരുന്നു. 19 പേരാണ് മൂന്നാറില് വിനോദയാത്രയ്ക്ക് പോയത്.
ഇവര് കൃത്യമായി അവധിയെടുത്തശേഷമാണ് ഉല്ലാസയാത്രയ്ക്ക് പോയതെന്നും റിപ്പോര്ട്ടില് വ്യക്തമാക്കുന്നു. തഹസില്ദാര് അടക്കം ജീവനക്കാരെ കലക്ടറേറ്റിലേക്ക് വിളിച്ചു വരുത്തി മൊഴിയെടുത്തശേഷമാണ് കലക്ടര് റിപ്പോര്ട്ട് തയ്യാറാക്കിയത്. 61 ജീവനക്കാരുള്ള താലൂക്ക് ഓഫീസിലെ 40 ഓളം പേര് കൂട്ടത്തോടെ അവധിയെടുത്തത് ഓഫീസിന്റെ പ്രവര്ത്തനം അവതാളത്തിലാക്കിയിരുന്നു.
