ചണ്ഡീഗഢ്: ലൈംഗികാരോപണം നേരിടുന്ന ഹരിയാന കായിക മന്ത്രി ദേശീയ പതാക ഉയർത്തുന്നതിനെതിരെ പ്രതിഷേധം. ബിജെപി മന്ത്രിയുടെ സ്വന്തം മണ്ഡലമായ പിഹോവയിൽ പതാക ഉയർത്തുന്നതിനിടെയാണ് പ്രതിഷേധമുണ്ടായത്. എൻസിപി വിദ്യാർത്ഥി വിഭാഗം ദേശീയ അധ്യക്ഷ സോണിയ ധുഹാനാണ് മന്ത്രിയെ തടയാൻ ശ്രമിച്ചത്.മന്ത്രിക്ക് മുന്നിൽ മുദ്രാവാക്യം ഉയർത്തി പ്രതിഷേധിച്ച സോണിയയെ പൊലീസ് അറസ്റ്റ് ചെയ്തു. സോണിയയെ പൊലീസ് കൈയേറ്റം ചെയ്യുന്നതും വലിച്ചിഴച്ച് കൊണ്ടുപോയതും കൂടുതൽ പ്രതിഷേധത്തിന് കാരണമായി.
കഴിഞ്ഞ മാസമായിരുന്നു മന്ത്രി സന്ദീപ് സിംഗിനെതിരെ ലൈംഗികാരോപണം ഉയർന്നത്. യുവ അത്ലറ്റിക്സ് പരിശീലകയാണ് ഇന്ത്യൻ ഹോക്കി ടീം മുൻ ക്യാപ്റ്റൻ കൂടിയായ സന്ദീപ് സിംഗിനെതിരെ പരാതി നൽകിയത്. പരാതിയിൽ ചണ്ഡീഗഢ് പൊലീസ് കേസെടുത്തതിന് പിന്നാലെ മന്ത്രിക്ക് കായിക വകുപ്പ് ഒഴിയേണ്ടിവന്നിരുന്നു. കേസിൽ അന്വേഷണം പുരോഗമിച്ചുകൊണ്ടിരിക്കവേയാണ് റിപ്പബ്ലിക് ദിനത്തിൽ ദേശീയ പതാക ഉയർത്തുന്നതിൽ സന്ദീപ് സിംഗിന് നേരെ പ്രതിഷേധമുണ്ടായത്.
