എ ഗ്രേഡ് പ്രഖ്യാപനം വന്നപ്പോൾ ശിവാനിയുടെ സന്തോഷം കൊണ്ട് കരയാതിരിക്കാനായില്ല.നിറകണ്ണുകളോടെ ചിരിച്ചു കൊണ്ട് അവൾ തന്റെ നൃത്താധ്യാപികയെ സ്മരിച്ചു. ഈ വിജയം ടീച്ചർക്കും കൂടിയുള്ളതാണ്. കാരണം ശിവാനിക്ക് നൃത്തത്തിനുള്ള ആടയാഭരണങ്ങളൊക്കെ ടീച്ചറാണ് വാങ്ങി നൽകിയത്. ഭരതനാട്യത്തിനുളള ഉടയാടക്കും ആഭരണത്തിനും നല്ല ചെലവ് വരും. ടാപ്പിങ്ങ് തൊഴിലാളിയായ.അച്ഛൻ ജയന് താങ്ങാവുന്നതിലും അപ്പുറമായിരുന്നു ഈ ചെലവെല്ലാം.
ശിവാനിയ്ക്കും ഇവിടെ വരെയുള്ള വഴി ഒട്ടും എളുപ്പമായിരുന്നില്ല. ഉപജില്ലാതലത്തിൽ അപ്പീൽ വഴിയാണ് ശിവാനി മത്സര രംഗത്തെത്തിയത്.
ജില്ലാതലത്തിലും എ ഗ്രേഡ് നേടിയിരുന്നു. ആറ് വയസ് മുതൽ ശിവാനി നൃത്തം അഭ്യസിക്കുന്നുണ്ട്. സംസ്ഥാന കലോത്സവത്തിൽ ഹൈസ്കൂൾ വിഭാഗം ഭരതനാട്യത്തിനാണ് എടവണ്ണ എസ്.എച്ച്.എം.ജി.വി.എച്ച്.എസ്.എസിലെ 10-ാം ക്ലാസ് വിദ്യാർഥിയായ ശിവാനി എ ഗ്രേഡോടെ മികച്ച വിജയം നേടിയത്.