സിംഗപ്പൂര്‍ ഓപ്പണില്‍ ഇന്ത്യയുടെ പി.വി സിന്ധുവിന് കിരീടം. ഫൈനലില്‍ ചൈനീസ് താരം വാംഗ് ഷി യിയെ പരാജയപ്പെടുത്തിയാണ് സിന്ധു സിംഗപ്പുര്‍ ഓപ്പണ്‍ സൂപ്പര്‍ 500 ബാഡ്മിന്റണ്‍ കിരീടം സ്വന്തമാക്കിയത്. ആദ്യ സെറ്റ് സ്വന്തമാക്കിയ സിന്ധുവിന് രണ്ടാമത്തെ സെറ്റ് നഷ്ടപ്പെട്ടു. എന്നാല്‍ മൂന്നാം സെറ്റിലെ മികച്ച പ്രകടനത്തിലൂടെ സിന്ധു വിജയം കണ്ടെത്തുകയായിരുന്നു. മികച്ച പ്രകടനം കാഴ്ച്ചവെച്ചങ്കിലും സിന്ധുവിന്റെ മുന്നില്‍ വാങ് കീഴടങ്ങുകയായിരുന്നു. ലോക 11-ാം നമ്പര്‍ താരമാണ് വാങ്. സിന്ധു റാങ്കിങ്ങില്‍ ഏഴാം സ്ഥാനത്തുമാണ്.
സ്‌കോര്‍ : 21-9, 11-21, 21-15.
സീസണില്‍ താരം സ്വന്തമാക്കുന്ന മൂന്നാം കിരീടമാണിത്. കൊറിയന്‍ ഓപ്പണ്‍, സ്വിസ് ഓപ്പണ്‍ ടൂര്‍ണമെന്റുകളിലെ നേരത്തെ സിന്ധു കിരീടം നേടിയിരുന്നു. സെമിയില്‍ ലോക 38-ാം നമ്പര്‍ താരം ജപ്പാന്റെ സെയ്ന കാവക്കാമിയെ പരാജയപ്പെടുത്തിയാണ് മൂന്നാം സീഡായ സിന്ധു ഫൈനലിലേയ്ക്ക് യോഗ്യത നേടിയത്.
സിന്ധുവിന്റെ ആദ്യ സിംഗപ്പൂര്‍ ഓപ്പണ്‍ കിരീടമാണിത്. സൈനയ്ക്ക് ശേഷം സിംഗപ്പൂര്‍ ഓപ്പണ്‍ കിരീടം നേടുന്ന രണ്ടാമത്തെ ഇന്ത്യന്‍ താരമാണ് സിന്ധു.
