ആന്ധ്രപ്രദേശില്‍ തൊഴിലാളികള്‍ കയറിയ ഓട്ടോയ്ക്ക് മുകളിലേക്ക് വൈദ്യുതി കമ്പി പൊട്ടി വീണ് ഏഴ് പേര്‍ക്ക് ദാരുണാന്ത്യം. പതിനൊന്ന് കെവി വൈദ്യുതി ലൈന്‍ ഓട്ടോറിക്ഷയുടെ മുകളില്‍ പൊട്ടിവീണ് തീപിടിക്കുകയായിരുന്നു. സത്യസായ് ജില്ലയില്‍ ഇന്ന് രാവിലെ ഏഴ് മണിക്കാണ് സംഭവം. കര്‍ഷകത്തൊഴിലാളികളുമായി പോയ ഓട്ടോറിക്ഷ വൈദ്യുതി തൂണില്‍ ഇടിച്ചാണ് അപകടം സംഭവിച്ചത്.
ഓട്ടോറിക്ഷ പൂര്‍ണമായും കത്തി നശിച്ചു. എട്ട് പേരാണ് വാഹനത്തില്‍ ഉണ്ടായിരുന്നത്. ഓട്ടോറിക്ഷ പൂര്‍ണമായും കത്തി നശിച്ചു. ഒരാള്‍ ഗുരുതരമായി പൊള്ളലേറ്റ് ആശുപത്രിയില്‍ ചികിത്സയിലാണ്. നാട്ടുകാര്‍ വിവരം അറിയിച്ചതിന് പിന്നാലെ വൈദ്യുതി വകുപ്പ് ജീവനക്കാര്‍ എത്തി വൈദ്യുതി ബന്ധം വിച്ഛേദിച്ചു. ഗുഡ്ഡാംപള്ളി നിവാസികളാണ് അപകടത്തില്‍ മരിച്ചതെന്നാണ് പ്രാഥമിക നിഗമനം.
മരിച്ചവരുടെ കുടുംബത്തിന് ആന്ധ്രാപ്രദേശ് സര്‍ക്കാര്‍ 5 ലക്ഷം രൂപ ധനസഹായം പ്രഖ്യാപിച്ചു. പരിക്കേറ്റവരുടെ കുടുംബത്തിന് 2 ലക്ഷം രൂപ ആശ്വാസധനസഹായമായി പ്രഖ്യാപിച്ചു. അപകടത്തില്‍ വിശദമായ അന്വേഷണം നടത്തുമെന്ന് ആന്ധ്രാപ്രദേശ് സര്‍ക്കാര്‍ അറിയിച്ചു.
