സിപിഐഎം സംസ്ഥാന സെക്രട്ടറിയേറ്റില് പി ജയരാജൻ ഇടംപിടിക്കാതെ പോയ സംഭവം വിവാദമായിരിക്കെ പദവിയല്ല നിലപാടാണ് പ്രധാനമെന്ന് ജയരാജന് പറഞ്ഞു.ഉള്പാര്ട്ടി ജനാധിപത്യമുള്ള പാര്ട്ടിയാണ് സിപിഎം (CPIM). വിമര്ശനവും സ്വയം വിമര്ശനവും ഉള്ള ഏക പാര്ട്ടിയും ഇതാണ്. ഇതുപോലൊരു പ്രക്രിയ കോൺഗ്രസിനുണ്ടോയെന്നും സ്വന്തം ലാഭത്തിന് വേണ്ടി ഗ്രൂപ്പുകൾ മാറിക്കൊണ്ടിരിക്കുകയാണെന്നും ജയരാജന് വിമര്ശിച്ചു. സംസ്ഥാന സെക്രട്ടറിയേറ്റിൽ പി ജയരാജനെ ഉള്പ്പെടുത്താത്തതില് ജയരാജന് അനുകൂലികളില് പ്രതിഷേധമുണ്ട്. എന്നാൽ ഞാൻ ഫേസ്ബുക്ക് കണ്ടിട്ടില്ല എന്നാണ് ജയരാജൻ മാധ്യമങ്ങൾക്ക് മറുപടി നൽകിയത് 42,000 പേര് അംഗങ്ങളായുള്ള റെഡ് ആര്മി ഒഫീഷ്യല്സ് എന്ന ഫെയ്സ്ബുക്ക് പേജിൽ ജയരാജന് അനുകൂല പോസ്റ്ററുകള് പ്രത്യക്ഷപ്പെട്ടിരുന്നു.പി.ജയരാജന് ഇത്തവണ സെക്രട്ടേറിയറ്റില് ഇല്ല, പക്ഷേ ജനങ്ങളോടൊപ്പം ഉണ്ട്, സ്ഥാനമാനങ്ങളില് അല്ല, ജനഹൃദയങ്ങളിലാണ് സ്ഥാനം’ എന്നാണ് റെഡ് ആര്മി ഒഫീഷ്യല്സ് എന്ന പേജില് പ്രത്യക്ഷപ്പെട്ട പോസ്റ്ററുകളില് പറയുന്നത്. കണ്ണൂരിന് താരകമല്ലോ എന്ന ജയരാജന് അനുകൂല വാഴ്ത്തുപ്പാട്ടും പേജില് പോസ്റ്റ് ചെയ്തിട്ടുണ്ട്.പി ജെ ആര്മിയെന്ന പേജ് പിന്നീട് പാര്ട്ടി നിര്ദേശത്തെ തുടര്ന്ന് പേര് മാറ്റുകയായിരുന്നു. പി ജയരാജനെ പിന്തുണയ്ക്കുന്ന ഇതര പ്രൊഫൈലുകളിലും പിന്തുണ കുറിപ്പുകള് പോസ്റ്റ് ചെയ്തിട്ടുണ്ട്.