ഇന്ത്യന് ക്രിക്കറ്റ് ടീം മുന് നായകന് വിരാട് കോഹ്ലിക്കെതിരായ പരാമര്ശത്തിനെതിരേ മാധ്യമങ്ങളെ അതിരൂക്ഷമായി വിമര്ശിച്ച് നിലവിലെ നായകന് രോഹിത് ശര്മ. ബാറ്റിങ്ങില് നിരന്തരമായി പരാജയപ്പെടുന്ന കോഹ്ലി മാനസിക സമ്മര്ദ്ദം നേരിടുന്നുണ്ടോയെന്ന മാധ്യമപ്രവർത്തകരുടെ ചോദ്യത്തിനാണ് രോഹിത് ചിരിച്ചുകൊണ്ട് കലഹിച്ചത്.
നാളെ ആരംഭിക്കാനിരിക്കുന്ന വെസ്റ്റിന്ഡീസിനെതിരായ ട്വന്റി 20 ക്രിക്കറ്റ് പരമ്പരക്ക് മുന്നോടിയായി മാധ്യമങ്ങളെ കാണുന്നതിനിടെയായിരുന്നു രോഹിതന്റെ രോഷപ്രകടനം. ഇത്തരം കാര്യങ്ങള് മാധ്യമങ്ങള് പടച്ചുവിടുന്നതാണെന്നും അല്പസമയം നിങ്ങള് സാങ്കല്പ്പിക വാര്ത്തകള് ചമയ്ക്കുന്നത് നിര്ത്തവച്ചാല് തീരാവുന്ന പ്രശ്നങ്ങള് മാത്രമേ ഇപ്പോഴുള്ളൂവെന്നും രോഹിത് പറഞ്ഞു.
”എല്ലാ പ്രശ്നങ്ങളുടെയും തുടക്കം മാധ്യമവാര്ത്തകളിലൂടെയാണ്. നിങ്ങള് കുറച്ചു സമയം മൗനം പാലിച്ചാല് എല്ലാ പ്രശ്നങ്ങളും അവസാനിക്കും. കോഹ്ലിക്ക് മാനസിക സമ്മര്ദ്ദമോ? നിങ്ങള് എന്തൊക്കെയാണ് ഈ പറയുന്നത്. അദ്ദേഹം നല്ല മാനസിക നിലയിലാണ്. എങ്ങനെ സമ്മര്ദ്ദങ്ങളെ കൈകാര്യം ചെയ്യണമെന്ന് അദ്ദേഹത്തിനു നന്നായി അറിയാം.”- രോഹിത് പറഞ്ഞു.
ഇരുതാരങ്ങളും തമ്മില് പരസ്പരം വൈരം സൂക്ഷിക്കുന്നുവെന്ന റിപ്പോര്ട്ടുകള്ക്കിടെയാണ് കോഹ്ലിയെ പിന്തുണച്ച് രോഹിത് പരസ്യമായി രംഗത്തു വന്നത്. ഇതിനു മുമ്പ് ട്വന്റി 20 ക്രിക്കറ്റ് ലോകകപ്പില് പാകിസ്താനും ന്യൂസിലന്ഡിനുമെതിരേ രോഹിത് പരാജയപ്പെട്ടപ്പോള് ഉയര്ന്ന വിമര്ശനങ്ങളില് രോഹിതിനെ പിന്തുണച്ച് കോഹ്ലിയും രംഗത്തെത്തിയിരുന്നു.
ഇരുവീഡിയോകളും പങ്കുവച്ച് ഇപ്പോള് കോഹ്ലിയുടെയും രോഹിതിന്റെയും ആരാധകര് മീഡിയയ്ക്കെതിരേ തിരിഞ്ഞിരിക്കുകയാണ്. ഇരുവര്ക്കുമിടയിലെ വൈരം ഇതാണ് എന്ന തരത്തില് ഈ വീഡിയോകള് പങ്കുവച്ച് മാധ്യമങ്ങള്ക്കെതിരേ ട്രോള് മഴപെയ്യിക്കുകയാണ് അവര് സോഷ്യല് മീഡിയയില്.
