ചൈനയിലെ ഏറെ ആളുകള് ഉപയോഗിക്കുന്ന പ്രസിദ്ധമായ ഖുറാന് ആപ്പ് നീക്കം ചെയ്ത് ആപ്പിള്. ചൈനീസ് അധികൃതരില് നിന്നുള്ള നിര്ദ്ദേശത്തിന് പിന്നാലെയാണ് ഖുറാന് മജീദ് എന്ന മൊബൈല് ആപ്പ് ആപ്പിള് സ്റ്റോറില് നിന്ന് ഒഴുവാക്കിയത്.
ലോകത്ത് എല്ലായിടത്തും ലഭ്യമായിരുന്ന ഈ ആപ്പിന് 150000ലേറെ റിവ്യൂസും ദശലക്ഷക്കണക്കിന് ഉപഭോക്താക്കളും ഉണ്ടായിരുന്നു. അനധികൃതമായി മതപരമായ ആശയങ്ങള് ഉപയോഗിച്ചതിനേത്തുടര്ന്നാണ് ആപ്പ് നീക്കം ചെയ്തതെന്നാണ് ബിബിസി സംഭവത്തേക്കുറിച്ച് റിപ്പോര്ട്ട് ചെയ്തിരുന്നു .ആപ്പ് നീക്കം ചെയ്തതിനേക്കുറിച്ച് സര്ക്കാരില് നിന്ന് വിശദാംശങ്ങള് തേടിയെങ്കിലും ഇതുവരെ അധികൃതര് പ്രതികരിച്ചിട്ടില്ലെന്നും ബിബിസി റിപ്പോര്ട്ടില് വിശദമാക്കുന്നു.
ചൈനീസ് അധികൃതരില് നിന്നും മറ്റ് രേഖകള് ആവശ്യമായ ഉള്ളടക്കം ആപ്പില് കണ്ടതിനേത്തുടര്ന്നാണ് ഇതെന്നാണ് ആപ്പിന്റെ നിര്മ്മാതാക്കളായ പിഡിഎംഎസ് അവരുടെ പ്രസ്താവനയില് പറയുന്നത്. പ്രശ്നപരിഹാരത്തിനായി ചൈനയിലെ സൈബര് അധികാരികളുമായി ബന്ധപ്പെടാനുള്ള ശ്രമത്തിലാണെന്നും ആപ്പിന്റെ നിര്മ്മാതാക്കള് വിശദമാക്കി.
എന്നാല് ചൈനയില് ഏത് പ്രാദേശിക നിയമങ്ങളെയാണ് ആപ്പ് ലംഘിച്ചതെന്ന കാര്യം ഇനിയും വ്യക്തമല്ല. ആഗോളതലത്തില് 35 ദശലക്ഷത്തിലധികം ആളുകളാണ് ഈ ആപ്പ് ഉപയോഗിക്കുന്നത്. നേരത്തെയും മതപരമായ ആപ്പുകള് സര്ക്കാരിന്റെ നിര്ദ്ദേശപ്രകാരം ആപ്പിള് നീക്കിയതായി ആരോപണം ഉയര്ന്നിരുന്നു.
