സംസ്ഥാനത്ത് കോവിഡ് കേസുകള് വര്ധിക്കുന്ന പശ്ചാത്തലത്തില് ഇന്നു മുതല് നിയന്ത്രണങ്ങള് കര്ശനമാക്കും.ഡി.വൈ.എസ്.പിമാരുടെയും അസിസ്റ്റന്റ് കമ്മിഷണര്മാരുടെയും നേതൃത്വത്തില് സബ് ഡിവിഷനുകള് രൂപീകരിച്ചാണ് നിയന്ത്രണങ്ങള്. മേഖലയിലെ പ്രതിരോധപ്രവര്ത്തനങ്ങളുടെ ചുമതല കോവിഡ് സബ് ഡിവിഷണല് ഓഫീസര്മാര്ക്കായിരിക്കും.
കണ്ടെയ്ന്മെന്റ് മേഖലയായി പ്രഖ്യാപിച്ചിരിക്കുന്ന സ്ഥലങ്ങളില് മൈക്രോ കണ്ടെയ്ന്മെന്റ് സോണ് രൂപീകരിച്ച് ഒരു വഴിയിലൂടെ മാത്രം യാത്ര അനുവദിക്കും. ഇതിനായി പഞ്ചായത്ത്, റവന്യൂ അധികൃതര്, സന്നദ്ധപ്രവര്ത്തകര് എന്നിവരുടെ സഹായം തേടും.
കോവിഡ് മാനദണ്ഡങ്ങള് സംബന്ധിച്ച് പ്രധാനപ്പെട്ട സ്ഥലങ്ങളില് മൈക്ക് അനൗണ്സ്മെന്റ് നടത്താന് സ്റ്റേഷന് ഹൗസ് ഓഫീസര്മാര് നടപടി സ്വീകരിക്കും. സാമൂഹ്യമാധ്യമങ്ങള് വഴി ബോധവത്കരണ പ്രവര്ത്തനങ്ങള് നടത്താനും തീരുമാനമായി.
ഡി വിഭാഗത്തില്പ്പെട്ട സ്ഥലങ്ങളില് അകത്തേയ്ക്കു കടക്കാനും പുറത്തേയ്ക്കു പോകാനുമുള്ള ഒരു വഴി ഒഴികെ ബാക്കി എല്ലാ റോഡുകളും അടയ്ക്കും. ഈ മേഖലകളില് മൊബൈല് പട്രോളിങ്ങ് ശക്തിപ്പെടുത്തും. സി വിഭാഗത്തില്പ്പെട്ട സ്ഥലങ്ങളില് വാഹന പരിശോധന ശക്തമാക്കും. ഹോം ക്വാറന്റൈന് കര്ശനമായി നടപ്പിലാക്കാനും നിര്ദേശിച്ചിട്ടുണ്ട്.
