പാലക്കാട് ഡിസിസി പ്രസിഡന്റ് സ്ഥാനം രാജിവെച്ച് വികെ ശ്രീകണ്ഠന് എംപി. എംപി എന്ന നിലയിലുള്ള ഭാരിച്ച ചുമതല നിർവഹിക്കാനുള്ളതു കൊണ്ടാണ് രാജിയെന്ന് അദ്ദേഹം പറഞ്ഞു. കോണ്ഗ്രസ് അധ്യക്ഷ സോണിയ ഗാന്ധിക്കും കെപിസിസി അധ്യക്ഷൻ മുല്ലപ്പള്ളി രാമചന്ദ്രനും രാജിക്കത്ത് അയച്ചു.
പാര്ലമെന്റ് തെരഞ്ഞെടുപ്പിന് ശേഷം മുതല് ഡിസിസി അധ്യക്ഷ സ്ഥാനത്തു നിന്നും മാറാന് പല തവണ സന്നദ്ധത പ്രകടിപ്പിച്ചിരുന്നു. എന്നാല് വരാനിരിക്കുന്ന തെരഞ്ഞെടുപ്പുകള് നിര്ണായകമാണെന്നും പുനസംഘടന വരുന്നതു വരെ കാത്തിരിക്കണമെന്നുമാണ് നേതൃത്വത്തില് നിന്നു ലഭിച്ച പ്രതികരണം. എന്നാല് പുനസംഘടന പലകാരണങ്ങള് കൊണ്ട് നീണ്ടു പോവുകയാണെന്നും എംപി എന്ന നിലയില് ഭാരിച്ച ഉത്തരവാദിത്തം തനിക്ക് നിറവേറ്റാനുണ്ടെന്നും വികെ ശ്രീകണ്ഠന്റെ രാജിക്കത്തില് പറയുന്നു. ഇന്നു തന്നെ രാജിക്കത്ത് സ്വീകരിക്കണമെന്നും രാജിക്കത്തില് പറയുന്നു.
തദ്ദേശ തിരഞ്ഞെടുപ്പില് കോണ്ഗ്രസിനു തിരിച്ചടിയുണ്ടായപ്പോള് ശ്രീകണ്ഠന് രാജിവയ്ക്കണമെന്ന് ഡിസിസി വൈസ് പ്രസിഡന്റ് സുമേഷ് അച്ചുതന് ആവശ്യപ്പെട്ടിരുന്നു. സുമേഷ് അച്ചുതന് ഇക്കുറി നിയമസഭാ തിരഞ്ഞെടുപ്പില് ചിറ്റൂര് മണ്ഡലത്തില് മത്സരിച്ചു പരാജയപ്പെട്ടു.
