ബുറേവി ചുഴലിക്കാറ്റിന്റെ പശ്ചാത്തലത്തില് കൊല്ലം, തിരുവനന്തപുരം ജില്ലകളില് വെള്ളപ്പൊക്കത്തിന് സാധ്യതയെന്ന് കേന്ദ്രജലക്കമ്മീഷന് അറിയിച്ചു. ബംഗാള് ഉള്ക്കടലില് രൂപം കൊണ്ട ബുറേവി ചുഴലിക്കാറ്റിന്റെ സഞ്ചാരപാതയില് കേരളവും ഉള്പ്പെടുന്നതായി കാലാവസ്ഥ നിരീക്ഷണ കേന്ദ്രം അറിയിച്ചു. തെക്കന് കേരളത്തിലും തെക്കന് തമിഴ്നാട്ടിലും ചുഴലിക്കാറ്റ് മുന്നറിയിപ്പ് പുറപ്പെടുവിച്ചിട്ടുണ്ട്. തെക്കന് ജില്ലകളിലെ 48 വില്ലേജുകള്ക്ക് അതീവ ജാഗ്രതാ നിര്ദേശം നൽകിയിട്ടുണ്ട്.
ചുഴലിക്കാറ്റ് നാളെ കന്യാകുമാരിയിലെത്തും. വെള്ളിയാഴ്ച പുലര്ച്ചയോടെ ചുഴലിക്കാറ്റ് കേരളതീരത്തെത്തുമെന്നാണ് കാലാവസ്ഥ വകുപ്പിന്റെ വിലയിരുത്തല്. ചുഴലിക്കാറ്റിന്റെ പശ്ചാത്തലത്തില് തെക്കന് കേരളത്തിലും മധ്യകേരളത്തിലും ശക്തമായ മഴയുണ്ടാകുമെന്നാണ് കാലാവസ്ഥ വകുപ്പിന്റെ മുന്നറിയിപ്പ്. ശക്തമായ കടല്ക്ഷോഭത്തിനും സാധ്യതയുണ്ട്.
നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ എന്നീ നാലു ജില്ലകളില് റെഡ് അലര്ട്ടും പുറപ്പെടുവിച്ചിട്ടുണ്ട്. കോട്ടയം, എറണാകുളം, ഇടുക്കി ജില്ലകളില് ഓറഞ്ച് അലര്ട്ടും പ്രഖ്യാപിച്ചു. ചുഴലിക്കാറ്റിന്റെ പശ്ചാത്തലത്തില് കേരള കടല്ത്തീരത്ത് എല്ലാവിധ മല്സ്യബന്ധനവും നിരോധിച്ചു. വിലക്ക് എല്ലാതരം മല്സ്യബന്ധന യാനങ്ങള്ക്കും ബാധകമായിരിക്കും. നിലവില് മല്സ്യബന്ധനത്തില് ഏര്പ്പെട്ടിരിക്കുന്നവര് എത്രയും പെട്ടെന്ന് ഏറ്റവും അടുത്തുള്ള സുരക്ഷിതതീരത്ത് എത്തിച്ചേരണം.
റവന്യൂ, പോലീസ്, അഗ്നിരക്ഷാ സേന, ഫിഷറീസ് വകുപ്പ്, ജലസേചന വകുപ്പ്, വൈദ്യുതി വകുപ്പ്, തദ്ദേശസ്ഥാപനങ്ങള് എന്നിവര് ആവശ്യമായ തയ്യാറെടുപ്പുകള് നടത്താൻ നിർദേശിച്ചിട്ടുണ്ട്. കേരള തീരത്ത് നിന്ന് കടലില് പോകുന്നതിന് പൂര്ണ്ണ വിലക്കേര്പ്പെടുത്തിയിട്ടുണ്ട്. നിലവില് മത്സ്യബന്ധനത്തിന് കടലില് പോയിട്ടുള്ളവര് എത്രയും പെട്ടെന്ന് അടുത്തുള്ള സുരക്ഷിത തീരത്തേക്ക്എത്തണമെന്ന മുന്നറിയിപ്പ് ഫിഷറീസ് വകുപ്പും കോസ്റ്റല് പോലീസും മത്സ്യതൊഴിലാളി സമൂഹത്തെ അറിയിക്കാൻ നിർദേശമുണ്ട്. ഇതിനായി മത്സ്യബന്ധന തുറമുഖങ്ങളിലും മത്സ്യബന്ധന ഗ്രാമങ്ങളിലും അനൗണ്സ്മെന്റ് ഉള്പ്പെടെയുള്ളവ നടത്തും.
കക്കി ഡാം, കല്ലട ഡാം, നെയ്യാര് റിസര്വ്വോയര് എന്നിവിടങ്ങളില് പരമാവധി ജാഗ്രത പാലിക്കാന് കേന്ദ്ര ജല കമ്മീഷന് മുന്നറിയിപ്പ് നല്കി. ശബരിമല തീര്ത്ഥാടന കാലം കണക്കിലെടുത്ത് മണിമലയാറ്റിലും അച്ചന്കോവില് ആറ്റിലും പമ്പയിലും ജാഗ്രതയ്ക്ക് നിര്ദേശം നല്കിയിട്ടുമുണ്ട്. മലയോര പ്രദേശങ്ങളില്ജാഗ്രതാ നിര്ദേശം പുറപ്പെടുവിച്ചു. പൊതുജനങ്ങള് ജാഗ്രത പാലിക്കണമെന്നും ദുരന്ത നിവാരണ അതോറിറ്റി ആവശ്യപ്പെട്ടു.
