ഐ.എച്ച്.ആര്.ഡി കോളേജുകളില് ഡിഗ്രി പ്രവേശനം
സംസ്ഥാന സര്ക്കാര് സ്ഥാപനമായ ഐ.എച്ച്.ആര്.ഡിയുടെ കീഴില് കാലിക്കറ്റ് സര്വ്വകലാശാലയുമായി അഫിലിയേറ്റ് ചെയ്തിട്ടുള്ള അപ്ലൈഡ് സയന്സ് കോളേജുകളിലേക്ക് 2020-21 അദ്ധ്യയന വര്ഷത്തില് ഡിഗ്രി കോഴ്സുകളില് കോളേജുകള്ക്ക് അനുവദിച്ച 50 ശതമാനം സീറ്റുകളില് ഓണ്ലൈന് വഴി പ്രവേശനത്തിന് അപേക്ഷ ക്ഷണിച്ചു. അപേക്ഷ http://ihrd.kerala.gov.in/cascap എന്ന വെബ്സൈറ്റ് വഴി ഓണ്ലൈനായി സമര്പ്പിക്കണം. ഓരോ കോളേജിലേയും പ്രവേശനത്തിന് പ്രത്യേകം പ്രത്യേകം അപേക്ഷകള് സമര്പ്പിക്കണം. ഓണ്ലൈനായി സമര്പ്പിച്ച അപേക്ഷയുടെ പ്രിന്റ് ഔട്ട് അനുബന്ധ രേഖകള്, രജിസ്ട്രേഷന് ഫീസ് 350 രൂപ (എസ്.സി, എസ്.റ്റി 150 രൂപ) ഓണ്ലൈനായി അടച്ച വിവരങ്ങള് സഹിതം പ്രവേശനം ആഗ്രഹിക്കുന്ന കോളേജില് ലഭിക്കണം. വിശദവിവരം ഐ.എച്ച്.ആര്.ഡിയുടെ www.ihrd.ac.in വെബ്സൈറ്റില് ലഭിക്കും. ഫോണ്- 0495-2765154, 8547005044.
കേരള മീഡിയ അക്കാദമി: പി.ജി.ഡിപ്ലോമ അപേക്ഷകള് ആഗസ്റ്റ് 14 വരെ
സംസ്ഥാന സര്ക്കാര് സ്ഥാപനമായ കേരള മീഡിയ അക്കാദമിയുടെ ഇന്സ്റ്റിറ്റ്യൂട്ട് ഓഫ് കമ്യൂണിക്കേഷന് നടത്തുന്ന ജേര്ണലിസം ആന്ഡ് കമ്യൂണിക്കേഷന്, പബ്ലിക് റിലേഷന്സ് ആന്ഡ് അഡ്വര്ടൈസിങ്ങ്, ടിവി ജേര്ണലിസം പോസ്റ്റ് ഗ്രാജ്വേറ്റ് ഡിപ്ലോമ കോഴ്സുകള്ക്ക് 2020 ആഗസ്റ്റ് 14 വരെ അപേക്ഷിക്കാം. പ്രിന്റ്, ടെലിവിഷന്, റേഡിയോ, ഓണ്ലൈന്, സോഷ്യല് മീഡിയ തുടങ്ങിയ മാധ്യമപ്രവര്ത്തനത്തിന്റെ വിവിധ മേഖലകളില് പരിശീലനം നല്കുന്ന സമഗ്രമായ പാഠ്യപദ്ധതിയാണ്് ജേര്ണലിസം ആന്ഡ് കമ്യൂണിക്കേഷന് കോഴ്സ്. പബ്ലിക് റിലേഷന്സ് ആന്ഡ് അഡ്വര്ടൈസിങ്ങ് കോഴ്സ് പ്രസ്തുത മേഖലയിലെ നൂതന പ്രവണതകള്ക്ക് ഊന്നല് നല്കുന്നതാണ്. കോഴ്സിന്റെ പാഠ്യപദ്ധതിയില് പ്രിന്റ്,ടെലിവിഷന്, സോഷ്യല് മീഡിയ, അഡ്വര്ടൈസിങ്ങ് എന്നിവയും ഉള്പ്പെടുന്നു. ടെലിവിഷന്, റേഡിയോ, സോഷ്യല് മീഡിയ, മീഡിയ കണ്വേര്ജന്സ്, മൊബൈല് ജേര്ണലിസം, കാമറ, എഡിറ്റിങ്ങ്, പ്രൊഡക്ഷന് തുടങ്ങി എല്ലാ വിഭാഗങ്ങളിലും സമഗ്രമായ പ്രായോഗിക പരിശീലനം നല്കുന്ന കോഴ്സാണ് ടെലിവിഷന് ജേര്ണലിസം.
കോഴ്സിന്റെ ദൈര്ഘ്യം ഒരുവര്ഷമാണ്. ഏതെങ്കിലും വിഷയത്തില് ബിരുദമാണ് അടിസ്ഥാന യോഗ്യത. അവസാനവര്ഷ ബിരുദ പരീക്ഷയെഴുതി ഫലം കാത്തിരിക്കുന്നവര്ക്കും അപേക്ഷിക്കാം. 31.5.2020 ല് 35 വയസ്സ് കവിയരുത്. പട്ടികജാതി, പട്ടികവര്ഗ, ഒ.ഇ.സി. വിഭാഗക്കാര്ക്ക് 2 വയസ്സ് ഇളവുണ്ടായിരിക്കും. ഈ വിഭാഗക്കാര്ക്ക് ഫീസിളവും ഉണ്ടാകും. അഭിരുചി പരീക്ഷയുടേയും ഇന്റര്വ്യൂവിന്റേയും അടിസ്ഥാനത്തിലായിരിക്കും പ്രവേശനം. കോവിഡ് 19 മാനദണ്ഡങ്ങള് പാലിച്ചു കൊണ്ടായിരിക്കും പ്രവേശന പരീക്ഷ നടത്തുക. പരീക്ഷാ സെന്ററുകളില് ഏതെങ്കിലും തരത്തില് മാറ്റങ്ങള് വരുന്ന പക്ഷം പരീക്ഷാര്ത്ഥികളെ മുന്കൂട്ടി അറിയിക്കുമെന്ന് സെക്രട്ടറി അറിയിച്ചു.
അപേക്ഷാഫോമും പ്രോസ്പെക്ടസും മീഡിയ അക്കാദമിയുടെ www.keralamediaacademy.org എന്ന വെബ്സൈറ്റില് നിന്ന് ഡൗണ്ലോഡ് ചെയ്യാം. അപേക്ഷാഫീസ് 300 രൂപ (പട്ടികജാതി, പട്ടികവര്ഗ, ഒ.ഇ.സി. വിഭാഗക്കാര്ക്ക് 150 രൂപ) അപേക്ഷയോടൊപ്പം സെക്രട്ടറി, കേരള മീഡിയ അക്കാദമി എന്ന പേരില് എറണാകുളം സര്വീസ് ബ്രാഞ്ചില് മാറാവുന്ന ഡിമാന്റ് ഡ്രാഫ്റ്റായി നല്കണം. ഫീസ് നല്കാത്ത അപേക്ഷകള് സ്വീകരിക്കില്ല. അപേക്ഷ 2020 ആഗസ്റ്റ് 14 ന് വൈകിട്ട് അഞ്ചിനകം സെക്രട്ടറി, കേരള മീഡിയ അക്കാദമി, കാക്കനാട്, കൊച്ചി – 30 എന്ന വിലാസത്തില് ലഭിക്കണം. ഫോണ്: 0484 2422275, 0484 2422068. ഇ-മെയില്: keralamediaacademy.gov@gmail.com .
സാധ്യതാ പട്ടിക പ്രസിദ്ധീകരിച്ചു
കോഴിക്കോട് ജില്ലയില് വിവിധ വകുപ്പുകളില് എല്.ഡി. ടൈപ്പിസ്റ്റ് കാറ്റഗറി നമ്പര്: 280/18, 281/18 തസ്തികകളുടെ തെരഞ്ഞെടുപ്പിനായി 2020 ജൂലൈ 15ന് നിലവില് വന്ന സാധ്യതാ പട്ടിക പ്രസിദ്ധീകരിച്ചതായി ജില്ലാ പിഎസ്സി ഓഫീസര് അറിയിച്ചു.
