കുന്ദമംഗലം: റോഡിൽ നിന്ന് ലഭിച്ച ഫോൺ ഉടമസ്ഥയ്ക്ക് കൈമാറി. കുരുമംഗലം തടത്തിൽ സ്വദേശിയായ സൈഫുദ്ദീൻ കോട്ടപ്പറമ്പിൽ നിന്ന് കുന്ദമംഗലത്തേക്ക് ബൈക്കിൽ യാത്ര ചെയ്യുന്നതിനിടെയാണ് റോഡിൽ ഒരു ഫോൺ കിടക്കുന്നത് ശ്രദ്ധയിൽപ്പെട്ടത്. ഉടൻ തന്നെ ഫോൺ എടുത്തതിനാൽ മറ്റു വാഹനങ്ങൾ കയറി കേടുപാടുകൾ സംഭവിക്കാതെ സംരക്ഷിക്കാനായി.
തുടർന്ന് ഫോൺ ഉടമസ്ഥയെ ബന്ധപ്പെടുകയും കുന്ദമംഗലം ഐ.ഐ.എം. ഗേറ്റിന് സമീപം വച്ച് ഫോൺ കൈമാറുകയും ചെയ്തു. പൊറ്റമ്മൽ മൈജി സ്ഥാപനത്തിൽ ജോലി ചെയ്യുന്ന പ്രിയയുടേതായിരുന്നു ഫോൺ.
ഫോൺ തിരികെ ലഭിച്ചതിലുള്ള സന്തോഷം പ്രിയ സൈഫുദ്ദീനോട് പങ്കുവെച്ചു. ഫോൺ ലഭിച്ചതിന്റെ സന്തോഷത്തോടെ പ്രിയയും കൂടെയുണ്ടായിരുന്നവരും സൈഫുദ്ദീനോട് നന്ദി പറഞ്ഞ് മടങ്ങി.
അപ്രതീക്ഷിതമായി ലഭിച്ച ഫോൺ സ്വന്തം ആവശ്യത്തിനായി ഉപയോഗിക്കാതെ ഉടമസ്ഥയെ കണ്ടെത്തി കൈമാറിയ സൈഫുദ്ദീന്റെ നടപടി സത്യസന്ധതയുടെയും സാമൂഹിക പ്രതിബദ്ധതയുടെയും മാതൃകയായി.
സത്യസന്ധതയുടെ മാതൃകയായി സൈഫുദ്ദീൻ; റോഡിൽ നിന്ന് ലഭിച്ച ഫോൺ ഉടമസ്ഥയ്ക്ക് കൈമാറി
