തിരുവനന്തപുരം: വഖഫ് ബോർഡ് പുനഃസംഘടനയുമായി ബന്ധപ്പെട്ട് മുഖ്യമന്ത്രി വി. ഡി. സതീശൻ ഉന്നയിച്ച വാദങ്ങൾ തള്ളി സി.പി.ഐ.എം കേന്ദ്രക്കമ്മിറ്റി അംഗവും മുൻ മന്ത്രിയുമായ പി. രാജീവ്. വഖഫ് ബോർഡിൽ അമുസ്ലിം അംഗങ്ങളെ ഉൾപ്പെടുത്തുന്ന കാര്യത്തിൽ മുഖ്യമന്ത്രി അസത്യം പ്രചരിപ്പിക്കുകയാണെന്നും വിഷയത്തിൽ അദ്ദേഹം ബി.ജെ.പി നിലപാടാണ് സ്വീകരിക്കുന്നതെന്നും പി. രാജീവ് ആരോപിച്ചു.
ബോർഡിലെ രണ്ട് ഒഴിവുകൾ സുപ്രീം കോടതിയുടെ പരിഗണനയിലുള്ളതിനാലാണ് മുൻ എൽ.ഡി.എഫ് സർക്കാർ മാറ്റിവെച്ചതെന്നും അല്ലാതെ അമുസ്ലിം അംഗങ്ങൾക്കാണെന്ന് എവിടെയും പറഞ്ഞിട്ടില്ലെന്നും അദ്ദേഹം വ്യക്തമാക്കി. ടാറ്റ പ്രതിനിധികളുമായുള്ള കൂടിക്കാഴ്ചയിലും എൽ.ഡി.എഫ് നേരത്തെ കൈക്കൊണ്ട ധാരണകൾ മറച്ചുവെച്ച് മുഖ്യമന്ത്രി തെറ്റിദ്ധാരണ പരത്തുകയാണെന്ന് അദ്ദേഹം കൂട്ടിച്ചേർത്തു.
അതേസമയം, പുതുക്കിയ കേന്ദ്ര നിയമം പാലിക്കേണ്ടി വരുമെന്ന് വ്യക്തമാക്കിയ മുഖ്യമന്ത്രി സതീശൻ, വിഷയത്തിൽ ഉണ്ടാകുന്ന പഴികൾ മുൻ എൽ.ഡി.എഫ് സർക്കാരിന്റെ തലയിൽ കെട്ടിവെക്കുകയാണെന്ന് ആരോപണമുണ്ട്. വഖഫ് ബോർഡിൽ രണ്ട് അമുസ്ലിംകളെ ഉൾപ്പെടുത്താമെന്ന് എൽ.ഡി.എഫ് സർക്കാരാണ് മുൻപ് തീരുമാനിച്ചതെന്നും കേന്ദ്ര നിയമപ്രകാരം ഇത് നടപ്പിലാക്കേണ്ടി വരുമെന്നുമാണ് സതീശന്റെ വാദം. വിഷയത്തിൽ പ്രതിപക്ഷ നേതാവ് വർഗീയ പ്രചാരണം നടത്തുകയാണെന്ന് കുറ്റപ്പെടുത്തിയ മുഖ്യമന്ത്രി, കാര്യങ്ങളിൽ കോടതിയുടെ നിലപാടനുസരിച്ച് അന്തിമ തീരുമാനമെടുക്കുമെന്നും അറിയിച്ചു.
