മുള്ളൻപന്നി കുറുകെ ചാടി, വിവാഹസംഘം സഞ്ചരിച്ച ഓട്ടോ മറിഞ്ഞ് അപകടം; ഡ്രൈവർക്ക് ദാരുണാന്ത്യം

കോഴിക്കോട്: തൂണേരിക്ക് സമീപം മുള്ളൻപന്നി റോഡിന് കുറുകെ ചാടിയതിനെ തുടർന്ന് നിയന്ത്രണംവിട്ട ഓട്ടോറിക്ഷ മറിഞ്ഞ് ഡ്രൈവർക്ക് ദാരുണാന്ത്യം. നരിപ്പറ്റ സ്വദേശി രജിലേഷ് (38) ആണ് അപകടത്തിൽ മരിച്ചത്. കുടുംബത്തോടൊപ്പം ഒരു വിവാഹ ചടങ്ങിൽ പങ്കെടുത്ത ശേഷം ഭാര്യ സൗമ്യയും രണ്ട് മക്കളുമായി ഓട്ടോയിൽ വീട്ടിലേക്ക് മടങ്ങുകയായിരുന്നു രജിലേഷ്. ബാലവാടി സ്റ്റോപ്പിന് സമീപം വെച്ച് പെട്ടെന്ന് റോഡ് മുറിച്ചുകടന്ന മുള്ളൻപന്നിയുടെ ദേഹത്ത് ഇടിക്കാതിരിക്കാൻ വാഹനം പെട്ടെന്ന് വെട്ടിച്ചപ്പോഴാണ് നിയന്ത്രണം നഷ്ടമായി ഓട്ടോ മറിഞ്ഞത്. വണ്ടി മറിഞ്ഞ് റോഡിലേക്ക് തലയിടിച്ചു വീണ രജിലേഷിനെ ഉടൻ തന്നെ മൊടക്കല്ലൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ കാലിന് പരിക്കേറ്റ ഭാര്യ സൗമ്യ നിലവിൽ ചികിത്സയിലാണ്. ഒപ്പമുണ്ടായിരുന്ന മക്കൾ പരിക്കുകളൊന്നുമില്ലാതെ രക്ഷപ്പെട്ടു.