കുന്ദമംഗലം: അഞ്ചുവർഷം മുമ്പ് ഉദ്ഘാടനം ചെയ്തിട്ടും പ്രവർത്തനം ആരംഭിക്കാത്ത ലൈഫ് ഫ്ലാറ്റ് പദ്ധതിക്കെതിരെ യൂത്ത് ലീഗ് പ്രവർത്തകർ ശിലാഫലകവുമായി എംഎൽഎ ഓഫീസിലേക്ക് മാർച്ച് നടത്തി. കുന്ദമംഗലം എംഎൽഎ P. T. A. Rahimയുടെ ഓഫീസിലേക്കാണ് പ്രതിഷേധ മാർച്ച് സംഘടിപ്പിച്ചത്.
മാവൂർ പൊൻപാറക്കുന്നിൽ നിർമിക്കാനിരുന്ന ലൈഫ് ഫ്ലാറ്റ് പദ്ധതിയുടെ ശിലാസ്ഥാപനം 2020 ഏപ്രിൽ 24ന് എംഎൽഎ നിർവഹിച്ചിരുന്നു. തുടർന്ന് പദ്ധതിയുടെ പ്രവർത്തി ഉദ്ഘാടനം മുഖ്യമന്ത്രി Pinarayi Vijayan ഓൺലൈൻ ആയി നിർവഹിച്ചു. എന്നാൽ അഞ്ചുവർഷം കഴിഞ്ഞിട്ടും സ്ഥലത്ത് നിർമാണ പ്രവർത്തനങ്ങൾ ആരംഭിച്ചിട്ടില്ലെന്നാരോപിച്ചാണ് യൂത്ത് ലീഗ് പ്രതിഷേധവുമായി രംഗത്തെത്തിയത്.
നിയോജകമണ്ഡലത്തിലെ ആറു പഞ്ചായത്തുകളിലെ ലൈഫ് പട്ടികയിൽ ഉൾപ്പെട്ട ഏകദേശം 300 ഭൂരഹിത കുടുംബങ്ങൾക്ക് ഒരു വർഷത്തിനകം ഫ്ലാറ്റുകൾ ഒരുക്കുമെന്ന് പ്രഖ്യാപിച്ചിരുന്നുവെന്നും എന്നാൽ അതിൽ യാതൊരു പുരോഗതിയും ഉണ്ടായിട്ടില്ലെന്നും പ്രതിഷേധക്കാർ ആരോപിച്ചു. മുമ്പ് സ്ഥാപിച്ച ശിലാഫലകവും എടുത്തുകൊണ്ടാണ് പ്രവർത്തകർ എംഎൽഎ ഓഫീസിലേക്ക് മാർച്ച് നടത്തിയത്.
കുന്ദമംഗലം ബസ് സ്റ്റാൻഡ് പരിസരത്ത് നിന്ന് ആരംഭിച്ച മാർച്ച് എംഎൽഎ ഓഫീസിന് മുന്നിൽ പൊലീസ് തടഞ്ഞു. തുടർന്ന് സ്ഥലത്ത് കുറച്ചുനേരം സംഘർഷാവസ്ഥയും ഉണ്ടായി.
ജില്ലാ മുസ്ലിം ലീഗ് പ്രസിഡണ്ട് M. A. Razak Master പ്രതിഷേധം ഉദ്ഘാടനം ചെയ്തു. യൂത്ത് ലീഗ് നിയോജകമണ്ഡലം പ്രസിഡണ്ട് കുഞ്ഞിമരക്കാർ മലയമ്മ അധ്യക്ഷത വഹിച്ചു. ഒ. ഹുസൈൻ, ഒ. എം. നൗഷാദ്, ഒ. സലീം, ഷാക്കിർ പാറയിൽ, ഹക്കീം മാസ്റ്റർ, സി. ടി. ഷരീഫ്, എൻ. ടി. അബ്ദുള്ള നിസാർ, അഡ്വ. ജുനൈദ്, സൈനുൽ ആബിദ് ടി. പി., എ. എം. അൽതാഫ്, റസാഖ് പുള്ളന്നൂർ, യാസീൻ കൂളിമാട്, നിസാം ചെറൂപ്പ എന്നിവർ സംസാരിച്ചു.ജനറൽ സെക്രട്ടറി എ. പി. അബ്ദുസമദ് സ്വാഗതവും ട്രഷറർ സൈഫുദ്ദീൻ കെ. പി. നന്ദിയും പറഞ്ഞു.
