രാജ്യത്ത് നാലാം ഘട്ട ലോക്ക് ഡൗണില് നടപ്പാക്കേണ്ട നിയന്ത്രണങ്ങളും ഇളവുകളും സംബന്ധിച്ച അന്തിമരൂപം തയ്യാറാവുന്നു. സംസ്ഥാന സര്ക്കാരുകളുടെ നിര്ദേശങ്ങള് കൂടി കണക്കിലെടുത്താണ് പുതിയ നിയന്ത്രണങ്ങളും ഇളവുകളും പ്രഖ്യാപിക്കുക. മൂന്നാംഘട്ട ലോക്ഡൗണ് ഞായറാഴ്ച അവസാനിക്കുന്ന സാഹചര്യത്തില് പ്രതിരോധമന്ത്രി രാജ്നാഥ് സിംഗിന്റെ അധ്യക്ഷതയിലുള്ള ഉന്നതാധികാര സമിതി ഇന്ന് യോഗം ചേരുന്നുണ്ട്.
ഹോട്ട് സ്പോട്ടുകള് ഒഴികെയുള്ള മേഖലകളില് കൂടുതല് ഇളവുകള് അനുവദിച്ചേക്കും. പൂര്ണമായും നിര്ത്തിവച്ച വിമാനസര്വ്വീസുകളുടെ നാലില് ഒന്നെങ്കിലും നാലാം ഘട്ട ലോക്ക് ഡൗണില് തുടങ്ങും. യാത്രക്കാരുടെ എണ്ണം നിയന്ത്രിച്ചു കൊണ്ട് ഓട്ടോറിക്ഷകളും ടാക്സികളും ഓടിക്കാനും നാലാം ഘട്ട ലോക്ക് ഡൗണില് അനുമതിയുണ്ടാവും. എല്ലാതരം ഓണ്ലൈന് വ്യാപാരവും അനുവദിക്കും.
ഹോട്ട് സ്പോട്ടുകള് നിശ്ചയിക്കാനുള്ള അവകാശം സംസ്ഥാന സര്ക്കാരുകള്ക്ക് കേന്ദ്രം നല്കിയേക്കും. ട്രെയിനുകളില് എത്തുന്ന യാത്രക്കാരെ പ്രത്യേക ബസുകളില് വീടുകളില് എത്തിക്കാന് സംസ്ഥാനങ്ങള്ക്ക് അനുമതി നല്കിയിട്ടുണ്ട്. ഇതിനായി സമൂഹ്യ അകലം ഉറപ്പാക്കി ബസ് സര്വ്വീസുകള് നടത്താമെന്നും കേന്ദ്ര ആഭ്യന്തര മന്ത്രാലയം സംസ്ഥാനങ്ങളെ അറിയിച്ചു.
