ന്യൂഡല്ഹി: ജമ്മു കശ്മീരിലെ കിഷ്ത്വാറില് മേഘവിസ്ഫോടനത്തിലും മിന്നല് പ്രളയത്തിലും കാണാതായവര്ക്ക് വേണ്ടിയുള്ള തിരച്ചില് തുടരുന്നു. 100ല് അധികം പേരെ കണ്ടെത്താന് ഉണ്ടെന്നാണ് റിപ്പോര്ട്ടുകള്. 60 മരണം സ്ഥിരീകരിച്ചിട്ടുണ്ട്.
സൈന്യത്തിന്റെ നേതൃത്വത്തിലാണ് രക്ഷാപ്രവര്ത്തനം പുരോഗമിക്കുന്നത്. എന്നാല് പ്രതികൂല കാലാവസ്ഥ രക്ഷാപ്രവര്ത്തനങ്ങള്ക്ക് വെല്ലുവിളി സൃഷ്ടിക്കുകയാണ്. മാതാ ചണ്ഡിയുടെ ഹിമാലയന് ക്ഷേത്രത്തിലേക്കുള്ള യാത്ര ആരംഭിക്കുന്ന ചസോതിയിലാണ് അപകടമുണ്ടായത്. തീര്ത്ഥാടകരാണ് അപകടത്തില്പ്പെട്ടതിലേറെയും.
മരിച്ചവരില് രണ്ട് പേര് സിഐഎസ്എഫ് ജവാന്മാരാണ്. ചോസ്തി, ഗാണ്ടര്ബാള്, പഹല്ഗാം മേഖലകളിലാണ് മേഘവിസ്ഫോടനം ഉണ്ടായത്. സൈന്യവും, എന്ഡിആര്എഫിന്റെ രണ്ട് സംഘങ്ങളും രക്ഷാപ്രവര്ത്തനത്തിനുണ്ട്. സ്ഥിതിഗതികള് വിലയിരുത്തിയ കേന്ദ്ര ആഭ്യന്തരമന്ത്രി അമിത് ഷാ സാധ്യമായ എല്ലാ സഹായവും ഉറപ്പു നല്കി.
