ഈ വര്ഷത്തെ എസ്.എസ്.എല്.സി ഫലം മെയ് ഒന്പതിന് പ്രഖ്യാപിക്കും. സംസ്ഥാനത്തൊട്ടാകെ 72 കേന്ദ്രീകൃത മൂല്യനിര്ണ്ണയ ക്യാമ്പുകളിലായി 2025 ഏപ്രില് 3 മുതല് 26 വരെ രണ്ട് ഘട്ടങ്ങളിലായി മൂല്യ നിര്ണ്ണയം കഴിഞ്ഞ് മാര്ക്ക് എന്ട്രി നടപടികള് പൂര്ത്തീകരിച്ചുവെന്നും മെയ് ഒന്പത് വെള്ളിയാഴ്ച ഫലം പ്രഖ്യാപിക്കുന്നതിന് ആവശ്യമായ മുന്നൊരുക്ക പ്രവര്ത്തനങ്ങള് നടന്നുവരുകയാണെന്നും വിദ്യാഭ്യാസ വകുപ്പ് മന്ത്രി വി ശിവന്കുട്ടി അറിയിച്ചു..
ഈ വര്ഷത്തെ എസ്.എസ്.എല്.സി/ റ്റി.എച്ച്.എസ്.എല്.സി/ എ.എച്ച്.എസ്.എല്.സി പരീക്ഷകള് 2025 മാര്ച്ച് 3ന് ആരംഭിച്ച് മാര്ച്ച് 26നാണ് അവസാനിച്ചത്. സംസ്ഥാനത്തൊട്ടാകെ 2,964 കേന്ദ്രങ്ങളിലും, ലക്ഷദ്വീപിലെ 9 കേന്ദ്രങ്ങളിലും, ഗള്ഫ് മേഖലയിലെ 7 കേന്ദ്രങ്ങളിലുമായി 4,27,021 വിദ്യാര്ത്ഥികളാണ് റഗുലര് വിഭാഗത്തില് പരീക്ഷ എഴുതിയത്.
റ്റി.എച്ച്.എസ്.എല്.സി. വിഭാഗത്തില് ഇത്തവണ 48 പരീക്ഷാകേന്ദ്രങ്ങളിലായി (3,057കുട്ടികളാണ് പരീക്ഷ എഴുതിയത്. എ.എച്ച്.എസ്.എല്.സി. വിഭാഗത്തില് ഒരു പരീക്ഷാ കേന്ദ്രമാണ് ഉളളത്. സംസ്ഥാനത്തൊട്ടാകെ 72 കേന്ദ്രീകൃത മൂല്യനിര്ണ്ണയ ക്യാമ്പുകളിലായി 2025 ഏപ്രില് 3 മുതല് 26 വരെ രണ്ട് ഘട്ടങ്ങളിലായി മൂല്യ നിര്ണ്ണയം കഴിഞ്ഞ് മാര്ക്ക് എന്ട്രി നടപടികള് പൂര്ത്തീകരിച്ചു. ഈ അദ്ധ്യയന വര്ഷം എട്ടാം ക്ലാസ്സില് സബ്ജക്ട് മിനിമം നടപ്പാക്കുന്നതിന്റെ ഭാഗമായി 30 ശതമാനത്തില് കുറവായി സ്കോര് നേടിയ കുട്ടികളുടെ വിവരങ്ങള് സമ്പൂര്ണ്ണ പ്ലസ്സ് വഴി ശേഖരിച്ചുവെന്നും മന്ത്രി അറിയിച്ചിട്ടുണ്ട്.
