ന്യൂഡല്ഹി: ഡല്ഹി മുഖ്യമന്ത്രിയും ആം ആദ്മി പാര്ട്ടി നേതാവുമായ അരവിന്ദ് കെജ്രിവാളിനെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തതില് പ്രതിഷേധിച്ച് മഹാറാലിയുമായി ഇന്ഡ്യ മുന്നണി. മാര്ച്ച് 31ന് രാംലീല മൈതാനിയിലാണ് പരിപാടിയെന്ന് ഡല്ഹി മന്ത്രിയും ആപ്പ് നേതാവുമായ ഗോപാല് റായ് പറഞ്ഞു.
രാജ്യത്ത് പ്രധാനമന്ത്രി നരേന്ദ്ര മോദിയുടെ ഏകാധിപത്യമാണ്. പ്രതിപക്ഷ പാര്ട്ടികളെ തകര്ക്കാന് പ്രധാനമന്ത്രി അന്വേഷണ ഏജന്സികളെ ഉപയോഗിക്കുന്നു. അറസ്റ്റ് മാത്രമല്ല ബി.ജെ.പി ചെയ്തത്, ആം ആദ്മി പാര്ട്ടിയുടെ ഓഫീസ് സീല് ചെയ്യുകയുമുണ്ടായി. നേതാക്കള്ക്ക് പാര്ട്ടി ആസ്ഥാനത്ത് എത്താന് പോലും സാധിച്ചില്ല.
രണ്ട് വര്ഷമായി ഡല്ഹി മദ്യനയ അഴിമതിയില് അന്വേഷണം നടത്തിയിട്ടും ഒന്നും കണ്ടെത്തിയിട്ടില്ല. ഇലക്ടറല് ബോണ്ട് വിവരങ്ങള് പുറത്തുവന്നപ്പോള് അഴിമതി പണം എവിടെപ്പോയെന്നു വ്യക്തമായതാണ്. ബി.ജെ.പിക്കാണ് എല്ലാ അഴിമതി പണവും ലഭിച്ചത്. ബി.ജെ.പി ഇലക്ടറല് ബോണ്ടിലൂടെ അഴിമതി നടത്തുകയായിരുന്നുവെന്നും അദ്ദേഹം പറഞ്ഞു.
