കല്പ്പറ്റ: മുട്ടില് മരംമുറി കേസില് കുറ്റപത്രം സമര്പ്പിച്ചു. 84,600 പേജ് ഉള്ളതാണ് കുറ്റപത്രം. അഗസ്റ്റിന് സഹോദരന്മാര് അടക്കം 12 പ്രതികളാണ് കേസില് ഉള്പ്പെട്ടിട്ടുള്ളത്. പൊതുമുതല് നശിപ്പിക്കല്, വഞ്ചന, വ്യാജരേഖ ചമയ്ക്കല്, ഗൂഢാലോചന അടക്കമുള്ള കുറ്റങ്ങളാണ് ചുമത്തിയിട്ടുള്ളത്. 420 സാക്ഷികളും 900 രേഖകളും കുറ്റപത്രത്തില് ഉള്പ്പെടുന്നു.സര്ക്കാര് ഉത്തരവിന്റെ മറവില് 105 മരങ്ങള് മുറിച്ചുമാറ്റിയെന്നാണ് കേസ്.
റവന്യൂ വകുപ്പിന്റെ വിവാദ ഉത്തരവിന്റെ മറപറ്റി നടന്ന മുട്ടില് മരം മുറിയില് അന്വേഷണ ഉദ്യോഗസ്ഥനായ ഡി.വൈ.എസ്പി വി.വി ബെന്നിയാണ് സുല്ത്താന്ബത്തേരി ഫസ്റ്റ് ക്ലാസ് മജിസ്ട്രേറ്റ് കോടതിയില് കുറ്റപത്രം നല്കിയത്. റോജി അഗസ്റ്റിന്, ആന്റോ അഗസ്റ്റിന്, ജോസൂട്ടി അഗസ്റ്റിന് എന്നിവര്ക്കൊപ്പം മുട്ടില് സൗത്ത് വില്ലേജ് ഓഫീസര് ആയിരുന്ന കെ.കെ അജി, സ്പെഷ്യല് വില്ലേജ് ഓഫീസര് സിന്ധു എന്നിവര് പ്രതികളാണ്. അഗസ്റ്റിന് സഹോദരന്മാരുടെ ഡ്രൈവര് വിനീഷ്, മരംമുറിക്ക് ഇടനിലക്കാരായിരുന്നവരും മരം വാങ്ങിയവരുമായ വിനീഷ്, ചാക്കോ, സുരേഷ്, അബൂബക്കര്, നാസര്, രവി, മനോജ് എന്നിവരും പ്രതിപട്ടികയില് ഉള്പ്പെട്ടിട്ടുണ്ട്.
