ന്യൂഡൽഹി: ആഭ്യന്തര വിമാനങ്ങളിലെ ടിക്കറ്റ് നിരക്കിൽ കുറവ്. ചില റൂട്ടുകളിലെ ടിക്കറ്റ് നിരക്കിൽ 50 ശതമാനത്തോളം കുറവാണ് ഈ ആഴ്ച ഉണ്ടായത്. ആഭ്യന്തര വിമാന ടിക്കറ്റ് നിരക്ക് കമ്പനികൾക്ക് തീരുമാനിക്കാമെന്ന കേന്ദ്ര വ്യോമയാന മന്ത്രാലയത്തിന്റെ സുപ്രധാന തീരുമാനത്തിനുപിന്നാലെയാണ് നിരക്കിൽ കുറവ് വന്നത്.
ഡൽഹി-മുംബൈ, ഡൽഹി-പൂനെ, പൂനെ-ഡൽഹി, ഡൽഹി-ശ്രീനഗർ, ശ്രീനഗർ-ഡൽഹി, ഡൽഹി-അഹമ്മദാബാദ്, അഹമ്മദാബാദ്-ഡൽഹി, ഡൽഹി-ലേ, ലേ-ഡൽഹി എന്നീ 9 റൂട്ടുകളിലെ ടിക്കറ്റ് നിരക്കിൽ ജൂൺ 5 നേക്കാൾ ജൂൺ 13 ന് കുറവുണ്ടായിട്ടുണ്ട്. മുബൈ-ഡൽഹി റൂട്ടിൽ മാത്രമാണ് നിരക്ക് വർധനവുണ്ടായത്. 13ന ശതമാനമാണ് നിരക്ക് വർധിച്ചത്.
ടിക്കറ്റ് നിരക്കിൽ ഏറ്റവും കുറവുണ്ടായിരിക്കുന്നത് ഡൽഹി-ലേ, ഡൽഹി-അഹമ്മദാബാദ് സെക്ടറുകളിലാണ്. 56 ശതമാനം കുറവാണ് ഈ റൂട്ടുകളിലെ ടിക്കറ്റ് നിരക്കിലുണ്ടായത്. അഹമ്മദാബാദ്-ഡൽഹി സെക്ടറിൽ 10 ശതമാനം കുറവാണുണ്ടായത്.
ഓരോ റൂട്ടിലും കുറഞ്ഞതും കൂടിയതുമായ നിരക്ക് കേന്ദ്ര സർക്കാർ തീരുമാനിക്കുന്ന രീതി മാറി കമ്പനികൾക്ക് തീരുമാനിക്കാമെന്ന് ജൂൺ 5 ന് കേന്ദ്ര സിവിൽ ഏവിയേഷൻ മന്ത്രി ജ്യോതിരാദിത്യ സിന്ധ്യ എയർലൈനുകളുടെ പ്രതിനിധികളുമായി നടത്തിയ കൂടിക്കാഴ്ചയിലാണ് അറിയിച്ചത്. എയൽ ടർബൈൻ ഇന്ധനത്തിന്റെ (എടിഎഫ്) വിലയിലുണ്ടാകുന്ന മാറ്റം കൃത്യമായി വിലയിരുത്തിയാണ് ടിക്കറ്റ് നിരക്കിലെ നിയന്ത്രണം എടുത്തുകളയാൻ തീരുമാനിച്ചത്.
