രാജ്യത്ത് കൊവിഡ് ബാധിതരുടെ എണ്ണം 93,92,920 കടന്നു. 24 മണിക്കൂറിനിടെ 41,810 പേര്ക്കാണ് പുതിയതായി രോഗം സ്ഥിരീകരിച്ചത്. ഇന്നലെ 496 പേര് കൂടി മരണപ്പെട്ടതോടെ ആകെ കൊവിഡ് മരണം 1,36,696 ആയി. 88,02,267 പേരാണ് ഇതുവരെ രോഗമുക്തി നേടിയത്.
അതേസമയം, പൂനെയിലെ സിറം ഇന്സ്റ്റിറ്റ്യൂട്ട് പുറത്തിറക്കുന്ന കൊവിഡ് വാക്സീന് കുട്ടികള്ക്കും പ്രായമായവര്ക്കും ഉടന് നല്കില്ല എന്ന വിവരം പുറത്തു വന്നു. 18വയസിന് താഴെയും 65ന് മുകളിലും പ്രായമുള്ളവരിലും ക്ലിനിക്കല് ട്രയല് നടത്താത്തതാണ് വാക്സിന് വൈകാന് കാരണം.
ഇന്ത്യയില് ആദ്യം വിപണിയിലെത്താന് തയാറെടുക്കുന്ന കൊവിഡ് വാക്സിനാണ് കൊവിഷീല്ഡ്. മൂന്നാം ഘട്ട ക്ലിനിക്കല് പരിശോധനയും പൂര്ത്തിയായതിനാല് ഇനി അടിയന്തരമായി പുറത്തിറക്കാനുള്ള സര്ക്കാര് അനുമതിക്കായാണ് പൂനെ സിറം ഇന്സ്റ്റിറ്റിയട്ട് കാത്തിരിക്കുന്നത് .രണ്ടാഴ്ചയ്ക്കകം അത് ലഭ്യമാക്കാനുള്ള അപേക്ഷ നല്കും. ഡിസംബര് അവസാനത്തോടെ വിപണിയിലെത്തുമെന്നാണ് പ്രതീക്ഷ. പക്ഷെ രോഗം ഗുരുതരമാകാന് സാധ്യതയുള്ള പ്രായവിഭാഗക്കാര്ക്ക് ആദ്യഘട്ടത്തില് വാക്സിന് നല്കില്ല. 18നും 65നും ഇടയിലുള്ളവരിലാണ് വാക്സിന് ട്രയല് പൂര്ത്തിയാക്കിയത്. അതിനാല് ഈ വിഭാഗക്കാര്ക്ക് മാത്രമാണ് തുടക്കത്തില് വാക്സിന് നല്കാനാവുക. നിലവിലെ ട്രയലില് നിന്ന് ഒഴിവാക്കപ്പെട്ട വിഭാഗക്കാരില് ആദ്യഘട്ട വാക്സിന് പുറത്തിറങ്ങിയതിന് പിന്നാലെ ക്ലിനിക്കല് ട്രയല് പൂര്ത്തിയാക്കാനാണ് സിറം ഇന്സ്റ്റിറ്റ്യൂട്ടിന്റെ ഇപ്പോഴത്തെ ശ്രമം. ഫലപ്രാപ്തി ഉറപ്പാക്കിയതിന് ശേഷം 65 വയസിന് മുകളിലും 18വയസിന് താഴെയും ഉള്ളവര്ക്ക് വാക്സീന് നല്കി തുടങ്ങും.