കൽപ്പറ്റ: രാഹുൽ ഗാന്ധിക്കെതിരായ അയോഗ്യതാ നടപടിയിൽ വയനാട്ടിൽ പ്രതിഷേധം തുടരുന്നു. ‘രാജ്യത്തിനൊപ്പം രാഹുലിനൊപ്പം’ എന്ന സന്ദേശവുമായി വയനാട് ജില്ലാ മുസ്ലീം യൂത്ത് ലീഗ് കമ്മിറ്റി കൽപ്പറ്റ ടൗണിൽ ‘സമരരാത്രി’ എന്ന പേരിൽ മാർച്ച് സംഘടിപ്പിച്ചു. രാഹുൽ ഗാന്ധിക്ക് ഐക്യദാർഢ്യം പ്രഖ്യാപിച്ചുകൊണ്ടു നടത്തിയ പ്രകടനത്തിൽ നൂറുകണക്കിന് പ്രവർത്തകർ പങ്കെടുത്തു. കൽപ്പറ്റ പിണങ്ങോട് ജംഗ്ഷനിൽ നിന്നാരംഭിച്ച മാർച്ച് നഗരം ചുറ്റി എച്ച്ഐഎം യുപി സ്കൂൾ പരിസരത്ത് സമാപിച്ചു.
പന്തം കൊളുത്തി നടത്തിയ പ്രകടനത്തിന് മുസ്ലീം യൂത്ത് ലീഗ് സംസ്ഥാന ട്രഷറർ പി ഇസ്മായിൽ, ജില്ലാ പ്രസിഡന്റ് എം പി നവാസ്, ജനറൽ സെക്രട്ടറി ഇൻചാർജ് സി എച്ച് ഫസൽ, ട്രഷറർ ഉവൈസ് എടവെട്ടൻ തുടങ്ങിയ നേതാക്കൾ നേതൃത്വം നൽകി. കൽപ്പറ്റയിൽ പീപ്പിൾസ് മാർച്ച് എന്ന പേരിൽ യൂത്ത് കോൺഗ്രസ് സംസ്ഥാന പ്രസിഡൻ്റ് ഷാഫി പറമ്പിലിൻ്റെ നേതൃത്വത്തിൽ ഞായറാഴ്ച രാത്രി പ്രതിഷേധം സംഘടിപ്പിച്ചിരുന്നു. ഇതിന് പിന്നാലെയാണ് യൂത്ത് ലീഗും വൻ പങ്കാളിത്തത്തോടെ സമരരാത്രി സംഘടിപ്പിച്ചത്.
