കോഴിക്കോട്: കക്കാടംപൊയിലിൽ ഓടിക്കൊണ്ടിരുന്ന കാർ തീപിടിച്ച് പൂർണ്ണമായും കത്തിനശിച്ചു. കക്കാടംപൊയിൽ പാതയിലെ കള്ളിപ്പാറയ്ക്കും പീടികപ്പാറയ്ക്കും ഇടയിൽ ഇന്ന് ഉച്ചയ്ക്ക് ശേഷമായിരുന്നു ഈ ഞെട്ടിക്കുന്ന അപകടം നടന്നത്. റെനോൾട്ട് ഡസ്റ്റർ മോഡൽ കാറാണ് അപകടത്തിൽപ്പെട്ടത്. യാത്രയ്ക്കിടയിൽ വാഹനത്തിന്റെ മുൻവശത്ത് നിന്നും പുക ഉയരുന്നത് ശ്രദ്ധയിൽപ്പെട്ട ഉടൻ തന്നെ കാറിലുണ്ടായിരുന്നവർ പുറത്തേക്ക് ഇറങ്ങിയതിനാൽ വൻ ദുരന്തം ഒഴിവാകുകയും എല്ലാവരും സുരക്ഷിതരായി രക്ഷപ്പെടുകയും ചെയ്തു. യാത്രക്കാർ ഇറങ്ങിയതിന് തൊട്ടുപിന്നാലെ കാറിലേക്ക് തീ ആളിപ്പടരുകയായിരുന്നു. വിവരമറിഞ്ഞ് മുക്കം അഗ്നിരക്ഷാ നിലയത്തിൽ നിന്നും ഫയർഫോഴ്സ് ഉദ്യോഗസ്ഥരെത്തി തീയണച്ചെങ്കിലും വാഹനം പൂർണ്ണമായി കത്തിയമർന്നു. അപകടമുണ്ടാകാനുള്ള കൃത്യമായ കാരണം ഇതുവരെ വ്യക്തമായിട്ടില്ല.
കക്കാടംപൊയിലിൽ ഓടിക്കൊണ്ടിരുന്ന കാറിന് തീപിടിച്ചു
