ന്യൂഡല്ഹി:പതിനെട്ടാം ലോക്സഭയുടെ ആദ്യ സമ്മേളനം ഇന്ന്. കേരളത്തിലെ പതിനെട്ട് പേര് ഇന്ന് ലോക്സഭാംഗങ്ങളായി സത്യപ്രതിജ്ഞ ചെയ്യും. വിദേശ സന്ദര്ശനം നടത്തുന്നതിനാല് തിരുവനന്തപുരം എംപി ശശി തരൂര് ഈ ആഴ്ച അവസാനമാകും സത്യപ്രതിജ്ഞ ചെയ്യുക. വയനാട് മണ്ഡലം ഒഴിഞ്ഞ രാഹുല് ഗാന്ധി റായ്ബറേലിയില് നിന്നുള്ള എംപിയായിട്ടായിരിക്കും സത്യപ്രതിജ്ഞ ചെയ്യുക. രാവിലെ 11 മണിക്ക് പ്രധാനമന്ത്രി നരേന്ദ്രമോദിയും പിന്നാലെ കേന്ദ്രമന്ത്രിമാരും സത്യപ്രതിജ്ഞ ചെയ്യും.
വൈകിട്ട് നാല് മണിയോടെയാകും കേരളത്തില് നിന്നുള്ള എംപിമാരുടെ സത്യപ്രതിജ്ഞ. അതേസമയം പ്രോടേം സ്പീക്കര് പദവിയില് നിന്ന് കൊടിക്കുന്നില് സുരേഷിനെ ഒഴിവാക്കിയതിനാല് അധ്യക്ഷനെ സഹായിക്കുന്ന പാനലില് നിന്ന് വിട്ടു നില്ക്കാന് ഇന്ത്യ സഖ്യം രാവിലെ തീരുമാനം എടുക്കും. ഡിഎംകെയുടെ കൂടെ അഭിപ്രായം തേടിയ ശേഷമായിരിക്കും ഇക്കാര്യത്തില് അന്തിമതീരുമാനം എടുക്കുക. രാവിലെ പത്ത് മണിക്ക് പാര്ലമെന്റിന്റെ വളപ്പില് എത്താന് കോണ്ഗ്രസ് എംപിമാര്ക്ക് പാര്ട്ടി നിര്ദേശം നല്കിയിട്ടുണ്ട്. എംപിമാര് ഒന്നിച്ചാകും സഭയിലേക്ക് നീങ്ങുക.
