കൊച്ചി: സംസ്ഥാനത്ത് മഴ കനത്തതോടെ നാശനഷ്ടം. നിര്ത്താതെ പെയ്യുന്ന മഴ എറണാകുളം, കോഴിക്കോട്, തൃശൂര് ഉള്പ്പടെയുള്ള ജില്ലകളില് ദുരിതം വിതയ്ക്കുകയാണ്. കോഴിക്കോട് മെഡിക്കല് കോളേജിലെ വാര്ഡുകളിലും അശ്വിനി ആശുപത്രിയുടെ കാഷ്വാലിറ്റിയിലും വെള്ളം കയറി. കൂടാതെ കാസര്കോട് കുമ്പള പൊലീസ് സ്റ്റേഷന് കെട്ടിടത്തിന്റെ സീലിംഗിന്റെ ഒരു ഭാഗം അടര്ന്ന് വീണു. രാത്രി 8:30 യോടെയായിരുന്നു സംഭവത്തില് തലനാരിഴയ്ക്കാണ് പൊലീസുകാര് രക്ഷപ്പെട്ടത്.
കോഴിക്കോട് മെഡിക്കല് കോളജിലെ മാതൃശിശു സംരക്ഷണ കേന്ദ്രത്തിലെ താഴത്തെ നിലയിലെ വാര്ഡുകളിലാണ് വെള്ളം കയറിയത്. റൂമുകളില് നിന്നും വെള്ളം പമ്പ് ചെയ്ത് നീക്കുകയാണ്. രോഗികളെ മാറ്റേണ്ട സാഹചര്യമില്ലെന്നും ആശുപത്രി സൂപ്രണ്ട് വ്യക്തമാക്കി. അശ്വനി ആശുപത്രിയിലെ കാഷ്വാലിറ്റിയില് വെള്ളം കയറിയതോടെ പ്രവര്ത്തനം മുകള് നിലയിലേക്ക് മാറ്റുകയായിരുന്നു.