പത്തനംതിട്ടയിൽ കെഎസ്ഇബി ഉദ്യോഗസ്ഥന് നേരെ കാട്ടാന ആക്രമണം. അസിസ്റ്റന്റ് എക്സിക്യൂട്ടീവ് എൻജിനീയർ ഷിബു തങ്കപ്പന് ആണ് കാട്ടാന ആക്രമണത്തിൽ പരുക്കേറ്റത്. വേലുത്തോടിന് സമീപത്ത് വെച്ച് ഇന്ന് ഉച്ചയ്ക്ക് 1. 30 ന് ആയിരുന്നു സംഭവം.
ബൈക്കിൽ ഓഫീസിലേക്ക് പോകുന്നതിനിടെ ഷിബു തങ്കപ്പനെ കാട്ടാന ആക്രമിക്കുകയായിരുന്നു. മൂഴിയാർ ഓപ്പറേഷൻ സബ് ഡിവിഷനിലെ ഓഫീസിലേക്ക് പോവുകയായിരുന്നു ഇദ്ദേഹം. ആക്രമണത്തിൽ ഷിബു തങ്കപ്പന്റെ കാലിന് ഒടിവ് സംഭവിച്ചു. ഇദ്ദേഹത്തിന്റെ ദേഹമാസകലം പരുക്കുമുണ്ട്.
