ആലപ്പുഴ: ആലപ്പുഴ, കോട്ടയം ജില്ലകളെ തമ്മിൽ ബന്ധിപ്പിച്ച് വേമ്പനാട് കായലിന് കുറുകെ നിർമ്മിച്ച മാക്കേക്കടവ് – നേരേകടവ് പാലം പൊതുജനങ്ങൾക്കായി തുറന്നു നൽകി. ഞായറാഴ്ച നടന്ന ചടങ്ങിൽ മുഖ്യമന്ത്രി വി.ഡി. സതീശൻ പാലത്തിന്റെ ഉദ്ഘാടനം നിർവ്വഹിച്ചു. സ്ഥലമേറ്റെടുപ്പുമായി ബന്ധപ്പെട്ട തടസ്സങ്ങൾ പരിഹരിച്ച് പാലം നിർമ്മാണം പൂർത്തിയാക്കിയത് മുൻ എൽഡിഎഫ് സർക്കാരാണ്. അരൂർ മണ്ഡലത്തിലെ തൈക്കാട്ടുശേരി മാക്കേക്കടവ് മുതൽ വൈക്കം ഉദയനാപുരം നേരേകടവ് വരെയെത്തുന്ന പാലത്തിന് 800 മീറ്റർ നീളവും 7.5 മീറ്റർ വീതിയുമുണ്ട്. 22 സ്പാനുകളും 80 ഗർഡറുകളും ഉള്ള പാലത്തിൽ ഇരുവശത്തും ഒന്നര മീറ്റർ വീതിയിൽ നടപ്പാതയും സജ്ജീകരിച്ചിട്ടുണ്ട്.
മാക്കേക്കടവിൽ സംഘടിപ്പിച്ച വർണ്ണാഭമായ ഉദ്ഘാടന ചടങ്ങിൽ മന്ത്രി പി.കെ. ബഷീർ, ഡെപ്യൂട്ടി സ്പീക്കർ ഷാനിമോൾ ഉസ്മാൻ, മന്ത്രിമാരായ രമേശ് ചെന്നിത്തല, മോൻസ് ജോസഫ്, എം. ലിജു, ആലപ്പുഴ ജില്ലാ പഞ്ചായത്ത് പ്രസിഡന്റ് എ. മഹേന്ദ്രൻ, ജില്ലാ കളക്ടർ ഷാജി വി. നായർ, മുൻ എം.പി എ.എം. ആരിഫ്, മുൻ എം.എൽ.എ സി.കെ. ആശ തുടങ്ങിയ പ്രമുഖർ പങ്കെടുത്തു.
2006-ൽ വി.എസ്. അച്യുതാനന്ദൻ സർക്കാരിന്റെ കാലത്താണ് തുറവൂർ-പമ്പ പാതയെന്ന ആശയത്തിന്റെ ഭാഗമായി ഈ പദ്ധതിക്ക് തുടക്കമിടുന്നത്. മുൻ ധനമന്ത്രി ഡോ. ടി.എം. തോമസ് ഐസക് പ്രാരംഭ തുക വകയിരുത്തിയതിനെത്തുടർന്ന് മണ്ണ് പരിശോധനയും മറ്റ് പ്രാഥമിക നടപടികളും ആരംഭിച്ചു. പിന്നീട് 2011-ലെ യുഡിഎഫ് സർക്കാർ നിർമ്മാണത്തിനായുള്ള തുക അനുവദിക്കുകയും 2016 ജൂണിൽ കരാർ ഒപ്പിടുകയും ചെയ്തു. തുടർന്ന് 2017-ൽ ഒന്നാം പിണറായി സർക്കാരിന്റെ കാലത്താണ് പാലത്തിന് തറക്കല്ലിട്ടത്. എന്നാൽ സമീപ റോഡിന്റെ സ്ഥലമേറ്റെടുപ്പുമായി ബന്ധപ്പെട്ട തർക്കങ്ങൾ കാരണം നിർമ്മാണം താത്കാലികമായി നിലയ്ക്കുകയായിരുന്നു.
മുൻ മന്ത്രി പി.എ. മുഹമ്മദ് റിയാസിന്റെ നേരിട്ടുള്ള ഇടപെടലും മുൻ ധനമന്ത്രി കെ.എൻ. ബാലഗോപാലിന്റെ ഫണ്ട് അനുമതിയും പദ്ധതിക്ക് വേഗം കൂട്ടി. നിർമ്മാണ സാമഗ്രികളുടെ വിലവർദ്ധനവ് കണക്കിലെടുത്ത് 42 കോടി രൂപ കൂടി അധികമായി അനുവദിച്ചതോടെ 2024 മാർച്ചിൽ പുനരാരംഭിച്ച നിർമ്മാണ പ്രവൃത്തികളാണ് ഇപ്പോൾ പൂർത്തിയായിരിക്കുന്നത്. ഈ പാലം യാഥാർത്ഥ്യമായതോടെ കോട്ടയത്തുനിന്നും എറണാകുളം, ആലപ്പുഴ ഭാഗങ്ങളിലേക്കുള്ള യാത്ര വളരെ എളുപ്പമാകും.
നാല് പതിറ്റാണ്ടുകളുടെ സ്വപ്നം പൂവണിഞ്ഞ മാക്കേക്കടവ്-നേരേകടവ് പാലത്തിന്റെ ഉദ്ഘാടന വേദിയിൽ രാഷ്ട്രീയ വാക്പോരും നാടകീയ രംഗങ്ങളും. കിഫ്ബിയെ വിമർശിച്ച പൊതുമരാമത്ത് മന്ത്രി പി കെ ബഷീറിന് മുൻ എംപി എ.എം. ആരിഫ് അതേ വേദിയിൽ മറുപടി നൽകി. പ്രസംഗിക്കാൻ വിളിക്കാതെ വിളിച്ച് വരുത്തി അപമാനിച്ചെന്ന് വൈക്കം മുൻ എംഎൽഎ സി.കെ. ആശ പറഞ്ഞു. ബഷീർ കെ.സി.വേണുഗോപാലിൻ്റെ പേര് പറയാതിരുന്നപ്പോൾ സദസിലെ കോൺഗ്രസുകാർ പ്രതികരിച്ചതും ഷാനിമോൾ ഉസ്മാൻ എ.എം. ആരിഫിനെ അഭിനന്ദിച്ചപ്പോൾ കൂക്കി വിളിച്ചതും നാടകീയ രംഗങ്ങൾക്ക് വഴിവച്ചു.
